Senat depýtattarynyń saılaýy ashyq demokratııa talaptaryna, saılaý zańnamalarynda belgilengen rásimderge saı ótti - OSK tóraǵasy
TANA. 22 tamyz. QazAqparat /Aıdar Ospanalıev/ - «Senat depýtattarynyń saılaýy uıymdasqan túrde, ashyq ári demokratııa talaptaryna sáıkes ótti.
Barlyq saılaý sharalary elimizdiń saılaý zańnamalarynda belgilengen rásimderge saı ótti», - dep málimdedi búgin Ortalyq saılaý komıssııasynyń tóraǵasy Qýandyq Turǵanqulov.
Onyń aıtýynsha, Senat depýtattary saılaýynyń ashyq-jarııaly ótkendigin halyqaralyq baıqaýshylar men Qazaqstan Respýblıkasy saıası partııalarynyń, qoǵamdyq birlestikteri men úkimettik emes uıymdary baıqaýshylary rastap otyr. «Osy saılaýda shet memleketter men halyqaralyq uıymdardyń baıqaýshylary saılaý naýqany barysyn baıqaý sharalaryn elimizdiń barlyq óńirlerinde júrgizdi. Daýys berý barysyn 372 halyqaralyq jáne otandyq baıqaýshylar, Qazaqstan Respýblıkasynyń saıası partııalary men qoǵamdyq birlestikteri, buqaralyq aqparat quraldarynyń ókilderi baıqady», - dedi OSK tóraǵasy.
Q.Turǵanqulovtyń aıtýynsha, 2008 jylǵy Senat depýtattarynyń saılaý barysyndaǵy daýys berý sharasyn 194 baıqaýshy men buqaralyq aqparat quraldarynyń ókilderi baıqaǵan. Osy ýaqytta Táýelsiz memleketter dostastyǵyna múshe memleketterdiń baıqaýshylar mıssııasy ókilderiniń qorytyndylary boıynsha málimdemesi jarııalanyp úlgerdi. «Onda Qazaqstan Respýblıkasyndaǵy saılaý protsesin uıymdastyrylý deńgeıine oń baǵa berilgen. Qazaqstandyq baıqaýshylar da ótken saılaýdy jaqsy baǵalap otyr. TMD mıssııasynyń qazaqstandyq baıqaýshylarynyń pikirinshe, saılaý naýqany básekelestik pen órkenıetti kúres jaǵdaıynda, saılaý zańynyń normalaryna sáıkes ótti jáne halyqaralyq demokratııalyq ólshemder qoıatyn talaptarǵa jaýap beredi. Búkil saılaý naýqany boıy Ortalyq saılaý komıssııasynyń atyna 2 ótinish kelip tústi. Olarda kórsetilgen faktiler dáleldenbedi», - dedi Q.Turǵanqulov.
