Senat depýtattaryn saılaýda básekelestik joǵary boldy – Nurlan Ábdirov
«14 qańtarda ótken Parlament Senaty depýtattarynyń kezekti saılaýynda árbir óńirden bir-bir ókilden 20 senator saılandy. Osy saılaýda balamalyq qaǵıdaty saqtalyp, kandıdattardyń básekelestik deńgeıi joǵary bolǵanyn atap ótken jón. Ortasha eseppen bir orynǵa 6 adamnan asa úmitkerden keldi. Osylaısha, respýblıka boıynsha Senat depýtattyǵyna 130 kandıdat usynylyp, 55 kandıdat daýysqa tústi. Senat saılaýynda kandıdattardyń jáne depýtattyq mandatqa ıe bolǵandardyń basym bóligi ózin-ózi usynýshylar boldy. Bul azamattyq qoǵamda jeke saıası múddeniń artyp kele jatqanyn kórsetedi. Aýmaqtyq saılaý komıssııalarynyń derekteri boıynsha saılaýda daýys berýge 3 167 tańdaýshynyń 2 904-i nemese 91,7 paıyzy qatysty. Bárine qarsymyn baǵany boıynsha daýys berý quqyǵyn barlyq óńirdiń tańdaýshylary qoldana aldy. Daýys berý kúni saılaý rásimderin, kandıdattardyń senim bildirgen adamdary, saıası partııalardyń, ózge de qoǵamdyq birlestikterdiń, kommertsııalyq emes uıymdardyń baıqaýshylary jáne BAQ ókilderi baıqady. Barlyǵy 235 adam qatysty», - dedi Nurlan Ábdirov Ortalyq saılaý komıssııasynyń otyrysynda.
Onyń atap ótýinshe, baıqaýshylardyń qyzmeti tańdaýshylar men saılaý protsesine basqa da qatysýshylardyń quqyqtaryn qamatmasyz etýge oń yqpalyn tıgizdi. Saılaý naýqany aıasynda barlyq kezeń BAQ-ta keńinen jáne ashyq jarııa etildi. Sonymen birge saılaý protsesine qatysýshylar BAQ ókilderi jáne basqa da nıet bildirýshiler Ortalyq saılaý komıssııasynyń ınternet resýrsynyń qosymsha fýnktsıonaly arqyly daýys berý kúni, ıaǵnı 14 qańtarda tańdaýshylardyń kelýi men daýys berýdiń aldyn ala qorytyndylary týraly aqparatqa onlaın rejımde qol jetkizdi.
«Saılaý týraly» Konstıtýtsııalyq zańnyń normalaryna sáıkes, búkil respýblıka boıynsha Parlament Senatynyń depýtattaryn saılaýdyń qorytyndylaryn OSK saılaý ótkizilgen kúnnen bastap 7 kún merzimnen keshiktirmeı shyǵarady. Búgingi kúni oblystardyń, Astana, Almaty, Shymkent qalalarynyń aýmaqtyq saılaý komıssııalarynan daýys berý nátıjeleri boıynsha Senat depýtattaryn saılaý jónindegi daýystardy sanaý nátıjeleri týraly barlyq hattama bizge kelip tústi»,- dedi OSK tóraǵasy.
Buǵan deıin QR Ortalyq saılaý komıssııasy QR Parlamenti Senatynyń depýtattaryn saılaýda daýys berýdiń aldyn ala nátıjelerin jarııalaǵanyn habarlaǵan edik.
