Senat depýtattary jumys saparymen Mańǵystaýǵa keldi
AQTAÝ. QazAqparat - Memleket basshysy Nursultan Nazarbaevtyń Joldaýynda kórsetilgen mindetterdi oryndaý maqsatynda, sondaı-aq memlekettiń áskerı qaýipsizdigin qamtamasyz etý salasynda júrgizilip jatqan reformalardy eskere otyryp, búgin Mańǵystaý oblysyna QR Parlamenti Senatynyń halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva bastaǵan bir top senatorlar keldi.
Depýtattar el tynyshtyǵy men qoǵamdyq qaýipsizdikti qamtamasyz etý maqsatynda QR Qarýly Kúshteri, Teńiz kúshteriniń qyzmetimen jáne Aqtaý halyqaralyq teńiz saýda porty jumysymen tanysty, dep habarlaıdy Mańǵystaý oblysy ákiminiń baspasóz qyzmeti.
Senatorlar aldymen oblys ortalyǵyndaǵy 29011 áskerı teńiz bazasyna bardy. Áskerı qyzmetshilermen júzdesti.
Odan keıin Aqtaý halyqaralyq teńiz saýda portyna arnaıy baryp, damý perspektıvasymen tanysty. Aqtaý teńiz porty - Kaspıı teńiziniń shyǵys jaǵalaýynda ornalasqan. Óndiristik qýaty - 17,7 mln. tonna. Porttyń aýmaǵy 79700 sharshy metr bolatyn ashyq alańy men aýmaǵy 2 myń sharshy metrlik jabyq tranzıttik qoımasy bar. Syıymdylyǵy 12,5 mln tonnadan deıin 13 myń tonnaǵa deıingi tankerdi alýǵa qabiletti tórt mamandandyrylǵan munaı quıý aılaǵy, jalpy júk tasymalyna arnalǵan úsh ámbebap aılaq bar. Sondaı-aq qýattylyǵy 2,5 mln tonnaǵa deıin «Ro-Ro» kemelerin, qýattylyǵy 2,0 mln tonna bolatyn temirjol paromdyq keshenin jáne jylyna 700 myń tonna astyq termınalyn mamandandyrylǵan aılaqqa shyǵara alatyn áleýetke ıe.
Odan keıin Aqtaý teńiz aılaǵynda Qazaqstan Respýblıkasy Parlamenti Senatynyń syrtqy baılanystar, qorǵanys jáne qaýipsizdik komıtetiniń kóshpeli májilisi ótti. Onda Qazaqstan Respýblıkasynyń Áskerı-teńiz kúshteri men Qarýly Kúshteriniń qyzmeti týraly máseleler qaraldy. Basqosýda Mańǵystaý oblysynyń ákimi E.Toǵjanov, Áskerı-teńiz kúshteriniń bas qolbasshysy, vıtse-admıral J.Januzaqov, QR UQK tóraǵasynyń orynbasary, QR Shekara qyzmetiniń dırektory D. Dılmanov jáne Aqtaý halyqaralyq teńiz saýda portynyń prezıdenti A. Týrkpenbaev qatysyp, sóz sóıledi.
Jıynnan keıin depýtattar «Sarbaz», «Qaraǵandy», «Alataý» jáne «Oral» kemelerinde bolyp, teńizshi sarbazdardyń jumysymen tanysty. Sonan soń «Saryarqa» áskerı kemesimen ashyq teńizge shyqty.
