Senat depýtattary joldy buzatyn júk kólikterine qatysty sheshim qabyldaýdy surady
NUR-SULTAN. QazAqparat - Senat tóraǵasynyń orynbasary Nurlan Ábdirov jáne senatorlar - Rysqalı Ábdikerov pen Sergeı Ershov elimizdegi mańyzdy avtojoldardyń sapasyna qatysty Úkimet basshysynyń atyna depýtattyq saýal joldady, dep habarlaıdy QazAqparat tilshisi.
Depýtattar saýalynda jyl saıyn joldardyń jóndelýi men kútimi úshin bólinetin qomaqty qarajat ta sóz boldy.
«Jahandyq básekege qabilettilik ındeksiniń nusqasy boıynsha úzdik jáne nashar joldary bar elder reıtıngisinde 2019 jyly Qazaqstan 100-den 43,2 ball jınap, 141 eldiń ishinde 93-orynǵa ıe boldy. Al, máselen, kórshiles elder – Tájikstan bizden joǵary 50-shi orynda, Ázerbaıjan – tipti 27-orynda. Bul salanyń júıeli problemalarynyń biri – júk kólikterdiń belgilengen bilik (os) júktemeleriniń asyp ketýine baılanysty salynǵan jáne jóndelgen joldardyń merziminen buryn buzylýy bolyp otyr», - dedi Rysqalı Ábdikerov.
Resmı statıstıkanyń derekterine sáıkes, tehnıkalyq sanattar bólinisinde el joldarynyń 9,3 paıyzy ǵana bilikke (os) 10 tonnadan astam júktemeni qabyldaı alady. Naqtylap aıtqanda, jalpy paıdalanymdaǵy joldyń 90,7 paıyzy qoldanystaǵy júk kólikterdiń eń az júktemesin de qabyldaı almaıdy jáne qater aımaǵynda tur.
«Sonymen qatar, zańnama talaptaryna sáıkes jalpy paıdalanymdaǵy avtokólik joldary boıynsha samosvalmen 25 tonnadan astam júk tasymaldaýǵa tyıym salynǵanymen, osy joldarda salmaǵy 30-40 tonna bolatyn júkti kóteretin kólikter qozǵalysy toqtamaı tur. Atalyp otyrǵan problemany tolyqtaı sheshý Kólikti baqylaý ınspektsııasynyń qolynan ázirshe kelmeı otyr. Sol sebepti bul qyzmettiń uıymdastyrylýy men sapasy Úkimet tarapynan qatan qadaǵalaýdy talap etedi dep esepteımiz», - delingen depýtattyq saýalda.
Senatordyń sózine qaraǵanda, Qazaqstannyń avtojoldarynda júretin aýyr salmaqty avtokólikterdiń 10 paıyzy ǵana baqylaý beketinde tekseriledi. Bul avtokólik joldarynyń jyldam buzylýyna óz áserin tıgizýde.
Depýtattar kóterilip otyrǵan máseleniń áleýmettik mańyzdylyǵyn eskere otyryp:
- kólikti baqylaý beketterdiń jáne Kólikti baqylaý ınspektsııasynyń jalpy shtat sanyń arttyrýdy;
- salmaǵy 25 tonnadan asatyn iri júkti tasıtyn samosvaldardy zańnamalyq deńgeıde tehnologııalyq kólik sanatyna jatqyzýdy jáne júk tasymaldaý faktisin (tehpasport negizinde, ólsheýsiz) tekserý quqyǵyn polıtsııaǵa da berilýin qarastyrýdy;
- jer qoınaýyn paıdalaný týraly kelisimshartarda jer qoınaýyn paıdalanýshylarǵa avtokólikterdiń artyq tıelýine tyıym salatyn talaptardy qarastyrýdy jáne olarǵa jaýapkershilikti qatańdatýdy;
- bıýdjettiń barlyq deńgeılerinen qarjylandyrylatyn jobalar boıynsha memlekettik satyp alý jónindegi normatıvter men konkýrstyq talaptarǵa júk avtokólikterin paıdalanýy boıynsha tıisti ózgerister engizýdi;
- kólikti baqylaý ınspektorynyń talaptaryn oryndamaǵany úshin jaýapkershilikti qatańdatýdy jáne osy joǵaryda kóterilgen máselelerdi sheshý boıynsha basqa da sharalardy Úkimet tarapynan qarastyrýdy surady.
