Senat depýtattary Jańaózende teńiz sýyn tuşytý zaýytyn salý máselesin qarady

NUR-SULTAN. QazAqparat - Jańaózen qalasynda senatorlar Serikbaı Trumov, Baqtybaı Shelpekov jáne Súıindik Aldashevtyń qatysqan dóńgelek ústel otyrysy boldy, dep habarlaıdy QazAqparat.

Kendirli demalys aımaǵynda teńiz sýyn tuşytý zaýytyn salý máselesi talqylaýdyń basty taqyryby boldy.

Kezdesýge jergilikti atqarýshy organdardyń basshylary, máslıhat depýtattary, Qoǵamdyq keńes pen ardagerler uıymynyń músheleri qatysty. Depýtattar joba jospary men sonyń aıasynda atqarylǵan jumystardyń qorytyndysyn qarap, halyqty aýyz sýmen úzdiksiz qamtamasyz etýdiń jáne osy máseleni jaýapty organdardyń turaqty baqylaýynyń mańyzdy ekenin atap ótti.

«Aımaqtaǵy mańyzdy mindetterdiń biri – halyqty aýyz sýmen qamtamasyz etý bolyp tabylady. Bul máseleni sheshý úshin keshendi jumystar júrgizilip jatyr. Qoıylǵan maqsattarymyzdyń nátıjeli oryndalýyna yqpal etý – bizdiń mindetimiz» , - dedi Serikbaı Trumov.

Senat depýtattary sonymen qatar jańa munaı-gaz óńdeý zaýytynyń qurylys aımaǵynda boldy. Onda 2022-2024 jyldarǵa josparlanǵan zaýyt qurylysyndaǵy jer ýchaskesimen jáne jobany iske asyrý josparymen tanysty.