Senat depýtattary zeınetaqy júıesin jańǵyrtý boıynsha zań jobasyn talqylaıdy
ASTANA. 29 sáýir. QazAqparat - Osy aptada Qazaqstan Parlamenti depýtattary birqatar zań jobalaryn qarastyrady.
Bul týraly búgin Ortalyq kommýnıkatsııalar qyzmetinde ótken brıfıngte resmı ókil Altaı Ábıbýllaev málimdedi.
«2 mamyr kúni QR Parlamenti Senatynyń Tabıǵatty paıdalaný jáne aýyldyq aımaqty damytý boıynsha komıtetiniń otyrysynda «Batys Eýropa - Batys Qytaı» halyqaralyq tranzıttik dálizi aıasynda «Ońtústik-Batys» jáne «Ońtústik-Shyǵys» tas joldaryn damytýǵa arnalǵan zań jobasy qarastyrylady», - dedi ol.
Onyń aıtýynsha, sonymen qatar, 3 mamyrda Senat el Parlamentiniń Májilisinde budan buryn talqylanǵan QR zeınetaqy júıesin jańǵyrtý boıynsha zań jobasyn qarastyrýdy josparlap otyr.
