Senat depýtattary tártipsizdikter kezinde kóz jumǵan beıbit turǵyndardyń jaqyndaryna kóńil aıtty

NUR-SULTAN. QazAqparat – QR Parlament Senatynyń otyrysynda depýtattar eldegi tártipsizdikter kezinde kóz jumǵan beıbit turǵyndar men kúshtik qurylym qyzmetkerleriniń jaqyndaryna kóńil aıtty, dep habarlaıdy QazAqparat tilshisi.

Senat otyrysyn bastaǵan tóraǵa Máýlen Áshimbaev qańtardyń alǵashqy kúnderindegi tártipsizdikter Táýelsizdik tarıhyndaǵy eń qasiretti oqıǵa retinde este qalatynyn atady.

«Ókinishke qaraı, kúshtik qurylymdardyń biraz qyzmetkeri qaza boldy. Biz olardyń erlikterin eshqashan umytpaımyz. Terrorısterdiń qolynan jazyqsyz jandar da qaıtys boldy. Qaza bolǵan azamattarymyzdyń otbasylary men jaqyndaryna qaıǵylaryna ortaqtasyp, kóńil aıtamyz. Jaraqattanǵan adamdardyń tezirek saýǵyp ketýine tilektestigimizdi bildiremiz», - dedi Máýlen Áshimbav.

Bul sózge Senat depýtaty Narıman Tóreǵalıev te qosyldy.

«Saýalymyzdy joldaýdan buryn memleketimizge, elimizdiń konstıtýtsııalyq qurylymyna qarsy jasalǵan shabýyl men búliktiń saldarynan qaıtys bolǵan beıbit turǵyndardyń, quqyq qorǵaý qyzmetkerleri men áskerılerdiń otbasyna qaıǵyryp kóńil aıtamyz. Táýelsiz elimizdiń tutastyǵynyń kepili retinde Prezıdent Qasym-Jomart Kemeluly Toqaev syndarly shaqta shuǵyl ári batyl qadamdar jasap mańyzdy sheshimder qabyldady», - dedi senator