Senat depýtattary Ońtústik Qazaqstan oblysyndaǵy bilim berý salasynyń jaǵdaıyna alańdaýshylyq bildirdi
ASTANA. Qazannyń 21-i. QazAqparat /Aıdar Ospanalıev/ - Búgin Parlament Senatynyń depýtaty Qýanysh Aıtahanov elimizdiń ońtústik óńirindegi bilim berý salasynyń jaǵdaıyna alańdaýshylyq bildirip, bir top depýtattar atynan Úkimet basshysy Kárim Másimovke saýal joldady.
«Búgingi tańda Qazaqstan Respýblıkasynyń Prezıdenti Nursultan Nazarbaevtyń tapsyrmasymen elimizdiń bilim berý salasyna memleket tarapynan úlken qoldaý kórsetilip otyr. Degenmen halyq sanynyń tez ósýine baılanysty Ońtústik Qazaqstan oblystyq bilim berý mekemeleriniń materıaldyq-tehnıkalyq bazasy kóbirek kóńil bólýdi kerek etedi», - dedi depýtat.
Ol keltirgen málimetterge qaraǵanda, qazirgi tańda Ońtústik Qazaqstan oblysy boıynsha jalpy bilim beretin 1 myń 21 mektepte 518 myń oqýshy bilim alady. Onyń ishinde 531 mektep yńǵaılastyrylǵan, 324 mektep shıki kirpishten salynǵan, 62 mektep ǵımaraty apatty jaǵdaıda tur. Bıylǵy oqý jylyna 50 myń 53 oqýshy birinshi synypqa barsa, 2011 jyly 56 myń 700, odan keıingi jylda 61 myń 700, al 2013 jyly 66 myń 723 bala mektepke barady. Al 12 jyldyq bilim berýge kóshetin bolsaq, mektepke 6-7 jas aralyǵyndaǵy 148 myń oqýshy barady dep josparlanýda.
«Bul degenińiz Ońtústik Qazaqstan oblysynda jyl saıyn qosymsha 40 mektep salý kerek bolady degendi bildirse kerek. Osyǵan baılanysty 2011 jyly tıisti qujattary tolyǵymen Bilim jáne ǵylym mınıstrligine ótkizilgen jalpy quny 18 mıllıard teńgeni quraıtyn 31 bilim berý nysandarynyń qurylysyn respýblıkalyq bıýdjet qarjysy esebinen júrgizý qajet. Osy máseleni jáne respýblıkanyń árbir tórtinshi oqýshysy Ońtústik Qazaqstan oblysyna keletinin eskere otyryp, 2011 jylǵa arnalǵan respýblıkalyq bıýdjetti josparlaý kezinde Ońtústik Qazaqstan oblysyna 31 bilim nysanynyń qurylysyn júrgizýge 18 mıllıard teńge bólý máselesin sheshýińizdi suraımyz», - depýtat.
