Senat depýtattary múgedekterdi áleýmettik qorǵaý máselesin talqylady
ASTANA. 9 qarasha. QazAqparat - Parlament Senaty depýtattarynyń memlekettik organdar jáne úkimettik emes uıymdar ókilderimen búgingi kezdesýinde múgedekterdi áleýmettik qorǵaý máselesi talqylandy,
dep habarlaıdy Senattyń baspasóz qyzmeti.
Senattyń Áleýmettik-mádenı damý komıtetiniń bastamasymen bolǵan sharanyń negizgi taqyryby «Qazaqstan Respýblıkasyndaǵy múgedekterdi áleýmettik qorǵaý týraly» zańyn júzege asyrý jáne Qazaqstandaǵy múgedekter quqyqtaryn qamtamasyz etý jáne ómir sapasyn jaqsartý jónindegi ulttyq jospar jobasyn oryndaý máselesi boldy.
Kezdesýdi asha kelip, komıtet tóraǵasy Aqan Bıjanov qoǵamdyq ómirge qatysý úshin múgedekterge teń múmkindikter jasaý, múgedekterdi áleýmettik qorǵaý jáne kásibı turǵyda ońaltý júıesin qalyptastyrý qajettigi týraly aıtty.
«Qazirgi kezde elimizde 563 myń múgedekter bar, bul jalpy halyqtyń 3 paıyzynan asady»,-dedi senator.
Múgedekterdi áleýmettik qorǵaý salasynda normatıvtik-quqyqtyq negiz jasaldy. Zańnama halyqqa eńbekke jaramdylyqty joǵaltý qaýpin eskertýge, múgedek bolǵan jaǵdaıda áleýmettik qamtamasyz etý jáne qoldaý, ómiri qıyn jaǵdaıdaǵy adamdarǵa arnaýly áleýmettik qyzmet kórsetýge baǵyttalǵan.
A.Bıjanov aıtqandaı, múgedekterdi eńbekke ornalastyrýǵa, olardyń qozǵalysy úshin jaǵdaıdy qamtamasyz etýge baılanysty ótkir máselelerdi sheshý úshin áleýmettik únqatysý múmkindigin belsendi iske qosyp, tıisti ınfraqurylym jasaý kerek.
Byltyr memleket bıýdjetiniń múgedekterdi áleýmettik qoldaý shyǵyndary 128 mıllıard teńgeni qurady. Degenmen, memleket qabyldaǵan sharalarǵa qaramastan sheshilmegen birqatar máseleler bar. Máselen, múgedekterdi eńbekke ornalastyrýda kóptegen qıyndyqtar kezdesedi, olardyń ınfraqurylymdarǵa qol jetkizýin qamtamasyz etý jónindegi jumystar óz deńgeıinde emes. Jergilikti jerlerdegi memlekettik basqarý organdarynda múgedekter arbasyna arnalǵan kirme joldar qurylysyn salýǵa, júrýine arnalǵan qurylǵylarǵa, jaıaýlar joldaryn dybys jáne jaryq belgilerin berý quraldarymen, múgedekterdi kólikke otyrǵyzý jáne túsirý tetikterimen jabdyqtaýǵa jetkilikti nazar aýdarylmaıdy.
Kezdesýde sóz alǵan Eńbek jáne halyqty áleýmettik qorǵaý mınıstri G.Ábdihalyqova mekemeniń múgedekterdi áleýmettik qorǵaý salasyndaǵy jumystary týraly depýtattardy habardar etti.
Mınıstr baıandaǵandaı, Qazaqstandaǵy múgedekter quqyqtaryn qamtamasyz etý jáne ómir sapasyn jaqsartý jónindegi ulttyq jospar jobasy aıasynda «múgedekterdi aınaladaǵy ortaǵa, ınfraqurylym nysandaryna, kólik, aqparat jáne baılanysqa, bilim berýge, densaýlyq saqtaýǵa, áleýmettik qyzmet kórsetý isine birdeı qol jetkizýin qamtamasyz etý» sharalary qarastyrylyp jatyr.
Talqylaý barysynda Qurylys jáne turǵyn úı-kommýnaldyq sharýashylyǵy isteri agenttiginiń basshysy S.Nokın, kólik jáne kommýnıkatsııa mınıstriniń orynbasary R.Sklıar, baılanys jáne aqparat mınıstriniń orynbasary S.Sársenov, Astana qalasy, Aqtóbe jáne Aqmola oblystary ákimdikteriniń ókilderi, úkimettik emes sektordyń aktıvteri sóz sóıledi.
Kezdesý sońynda Senattyń Áleýmettik-mádenı damý komıtetiniń tóraǵasy A.Bıjanov múgedekterdi áleýmettik qorǵaý salasyndaǵy zańnamalardy oryndaý jáne mınıstrlik ázirlegen Ulttyq jospardy iske asyrýdyń mańyzdylyǵyn atap ótti. Osyǵan baılanysty senator bul jumystar múgedekter ómirin jaqsartýǵa, olardyń qoǵam ómirine qatysýyna teńdeı múmkindikterdi qamtamasyz etýge yqpal etetinine senim bildirdi.
