Senat depýtattary «QR keıbir zańnamalyq aktilerine otbasy úlgisindegi balalar aýyldary jáne jasóspirimder úıleri máseleleri boıynsha ózgerister men tolyqtyrýlar týraly» zań jobasyn talqylady

Jıyn barysynda negizgi baıandama jasaǵan QR Bilim jáne ǵylym vıtse-mınıstri Mahmetǵalı Sarybekovtiń atap ótýinshe, qazirgi ýaqytta elimizde 610 bala tárbıelenip otyrǵan otbasy úlgisindegi 10 balalar aýyly bar eken. Onyń 7-eýi memlekettik bolsa, 3-eýi memlekettik emes mekeme. Sonymen qatar 27 jasóspirimder úılerinde balalar úıleriniń 1300-den astam bitirýshileri turyp jatyr.

Jalpy buǵan deıin 2000 jyly «Otbasy úlgisindegi balalar aýyly jáne jasóspirimder úıleri týraly» QR Zańy qabyldanǵan bolatyn. «Atalǵan zańnyń qabyldanǵanyna mine 10 jyl ótti. Osy ýaqyt aralyǵynda qoldanystaǵy zańǵa praktıkter men zańgerlerdiń pikirlerine sáıkes tıisti ózgertýler men tolyqtyrýlar engizý qajettigi týyndady. Sondyqtan aldaryńyzǵa usynylyp otyrǵan Zań jobasy qazirgi zaman talabyna saı jáne Úkimettiń 2009 jylǵa arnalǵan zań jobalaý jumystarynyń josparyna sáıkes ázirlendi», dedi vıtse-mınıstr.

Onyń aıtýyna qaraǵanda, zań jobasyn talqylaý kezinde jumys tobyna otbasy úlgisindegi balalar aýylynyń jumys erekshelikterin jaqsy meńgergen uıymdardyń ókilderinen tárbıeshi-analardy jumysqa qabyldaý kezinde jasyna jáne bilimine qatysty shekteýlerdi alyp tastaý jóninde usynystar túsken. Osyǵan oraı mınıstrlik respýblıkadaǵy balalar aýyldarynda jumys isteıtin tárbıeshilerdiń áleýetti quramyn zerdelegen.

«Búginde otbasy úlgisindegi 10 balalar aýylynda 90 tárbıeshi-ana jumys isteıdi», dep atap ótken M.Sarybekov sońǵy 3 jylda olardyń 32-siniń jumystan óz erikterimen bosaǵandyǵyn aıtty. Bul úrdis tárbıeshilerdiń densaýlyqtaryna, otbasy qurýyna jáne burynǵy turǵylyqty jerine qaıtyp oralýyna tikeleı baılanysty.

Osyndaı jaıttardy eskergen mınıstrlik jańa zań jobasynda tárbıeshilerdiń jas shamasyna shekteýdi alyp tastaýdy usynyp otyr.