Senat depýtattary Qazaqstannyń aqparattyq qaýipsizdigine baılanysty parlamenttik tyńdaý ótkizý týraly másele kóterdi
ASTANA. Jeltoqsannyń 8-i. QazAqparat /Qanat Mámetqazyuly/ - Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń otyrysyndaǵy «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Senat depýtattary elimizdiń aqparattyq qaýipsizdigi jaıynda áńgime qozǵap, bul týraly parlamenttik tyńdaý ótkizý jóninde másele kóterdi,
dep habarlaıdy QazAqparat.
Jobany talqylaý barysynda senator Qýanysh Aıtahanov ońtústiktegi Ózbekstanmen shekaraǵa basa nazar aýdarý qajettigin aıtyp, osy mańda qonystanǵan 700 myń halyq aqparattyq qamtamasyz etilmeı otyrǵanyn sóz etken bolatyn. Onyń aıtýynsha, shekara mańyndaǵy óńirlerdi ıdeologııalyq máseleden alshaqtatpaý, qaıta memlekettik aqparatpen tolyq qamtamasyz etýdi durys jolǵa qoıý qajet. Senatordyń paıymdaýynsha, bunda másele shekara mańyndaǵy jıilikti paıdalaný eki memlekettiń kelisimsharty arqyly ǵana sheshimin tabady. «Eger jıilikti paıdalaný týraly kelisim durys sheshilse, shekara mańyndaǵy aýdandardyń barlyǵy qazaq tilinde habar kóre alatyn bolady», dedi Q. Aıtahanov.
Sonymen birge, senator Svetlana Jalmaǵambetova da saılaýshylarmen kezdesýi barysynda dál osy máseleniń ózekti áńgimege ulasqanyn alǵa tartty. «Soltústik oblystaǵy birqatar aýdandar spýtnık arqyly bir telearnanyń kórsetiletinin aıtady. Reseılik bolýy múmkin dep sanalatyn osy arnada Qazaqstan týraly teris aqparattar taralyp, tipti lańkestik áreketter týraly da aıtylatyn kórinedi», dedi S. Jalmaǵambetova.
Osyndaı áńgime barysynda senator Baýyrjan Muhamedjanov áriptesteriniń Qazaqstannyń aqparattyq qaýipsizdigi týraly kótergen máselesine qoldaý bildire otyryp, elimizdiń keıbir óńirlerinde aqparattyń jetpeýinen úlken problema týyndaıtynyn atap ótti. «Meniń oıymsha, jalpy Qazaqstandaǵy aqparattyq qaýipsizdik máselesine arnalǵan parlamenttik tyńdaý ótkizgen, onda jan-jaqty talqylaýlar jasaǵan oryndy. Óıtkeni, Qazaqstan azamattary ózderiniń elinde otyryp, óz memleketinde bolyp jatqan jańalyqtan qur qalýynyń ózi úlken problema», dedi B. Muhamedjanov.
