Senat depýtattary «QazAgroÓnim» korporatsııasy» jáne «Asyl túlik» aktsıonerlik qoǵamynyń basshylarymen kezdesti
TANA. 28 qyrkúıek. QazAqparat - Búgin Parlament Senatynyń Agrarlyq máseleler jáne qorshaǵan ortany qorǵaý komıteti depýtattarynyń Aqmola oblysyna barǵan sapary aıasynda «QazAgroÓnim» korporatsııasy» jáne «Asyl túlik» aktsıonerlik qoǵamynyń basshylarymen kezdesip, Qazaqstandaǵy asyl tuqymdy mal sharýashylyǵyn damytý máselelerin talqylady,
dep habarlaıdy baspasóz qyzmeti.
Elimizdiń agroónerkásip keshenin damytýdaǵy basym baǵyttardyń biri asyl tuqymdy mal sharýashylyǵy bolyp tabylady. Memleket basshysy sala aldyna naqty mindetter qoıyp, onyń ishinde 2016 jylǵa qaraı et eksportyn 60 myń tonnaǵa deıin jetkizý mejelendi.
Asyl tuqymdy mal ósirý árqashan sharýashylyqtyń betke ustar baǵyty sanalyp keledi. Kezdesýde memlekettik qoldaýdyń arqasynda qazirgi kezde bul sala sapalyq turǵyda jańa deńgeıde damyp kele jatqany aıtyldy. Asyl tuqymdy mal sharýashylyǵyn qoldaý men damytýdyń quqyqtyq rettelýi de oǵan yqpal etedi.
Qazirgi kezde Parlamentte jańa zań jobasy qaralyp jatyr. Asyl tuqymdy sharýashylyq deńgeıinen asyl tuqymdy mal sharýashylyǵy mártebesine almasý ondaǵy basty jańalyq bolyp tabylady. Ol ónimdiligi joǵary mal ósiretin agrofırmalardy memlekettik sýbsıdııalarmen qoldaýǵa múmkindik beredi.
Asyl tuqymdy mal sharýashylyǵynyń qyzmetine atqarýshy organdardyń aralaspaıtyny da jańalyq bolyp otyr. Bul keıbir mindetterdi qoǵamdyq uıymdar men assotsıatsııalarǵa berý arqyly memlekettik organdardyń tuqymdyq-suryptaý jumystaryn retteýge áserin tómendetýge múmkindik beredi. Asyl tuqymdy mal baǵasyn anyqtaýdyń jańa ádisteri engiziletin bolady. Sonymen birge zań jobasymen mal sharýashylyǵyndaǵy suryptaý jáne asyldandyrý jumystaryn sýbsıdııalaý da qarastyrylýda.
Kezdesýde sondaı-aq et eksportynyń áleýetin arttyrý, maldy ósirý jaǵdaılaryn, veterınarlyq qaýipsizdikti jaqsartý, bordaqylaý alańdaryn, ósirip-taratýshy sharýashylyqtar qurylystaryn salý jáne sharýa qojalyqtaryn nyǵaıtý máseleleri talqylandy.
Kezdesý sońynda Agrarlyq máseleler jáne qorshaǵan ortany qorǵaý komıtetiniń tóraǵasy B.Jylqyshıev memleket qazirgi kezde barlyq múmkindikterdi berip otyrǵanyn, Qazaqstandaǵy mal sharýashylyǵyn damytý jónindegi aýqymdy jobalardy júzege asyrýǵa aýyl sharýashylyǵy qurylymdary, sharýa jáne fermer qojalyqtary belsendi túrde qatysa alatynyn atap ótti.
