Senat depýtattary elimizdiń farmatsevtıka salasyn damytý máselelerin talqylady
ASTANA. Mamyrdyń 25-i. QazAqparat /Qanat Mámetqazyuly/ - Búgin QR Parlamenti Senatynyń Áleýmettik-mádenı damý komıtetiniń depýtattary Densaýlyq saqtaý mınıstrligi jáne «SK-Farmatsııa» kompanııasynyń basshylyǵymen kezdesti. Kezdesý barysynda elimizdiń farmatsevtıka salasyn damytý men dári-dármek naryǵynda dári-dármekterdiń biryńǵaı dıstrıbıýtoryn engizý máseleleri talqylandy,
dep habarlaıdy QazAqparat.
Jıynǵa jetekshilik etken komıtet tóraǵasy Aqan Bıjanov talqylanyp otyrǵan máselelerdiń ózektiligine toqtalyp, Halyq densaýlyǵy kodeksinde qamtylǵan dári-dármekpen qamsyzdandyrýdyń zamanaýı úlgisi men otandyq farmatsııaǵa memlekettik standarttardy engizý máselelerine aýdardy. Sonymen birge, atalmysh salada engizilgen biryńǵaı dıstrıbıýtordyń maqsatyna toqtalǵan senator, onyń farmatsevtıkalyq ónerkásipti damytýdaǵy jáne dári-dármekpen memlekettik qamtamasyz etý naryǵyndaǵy rolin atap ótti. Onyń aıtýynsha, kompanııa sonymen qatar, salada ortaq aqparattyq júıe qurý, satyp alý sulbalarynyń móldirligin, kólik jáne qoıma logıstıka júıesiniń tıimdiligin arttyrýdy qamtamasyz etý men dári-dármekterdi satyp alýǵa bólinetin bıýdjet qarajatyn tıimdi paıdalanýǵa qatysty sharalardy júzege asyrýda mańyzdy rol atqarýy tıis.
Sonymen qatar, jıyn barysynda «SK-Farmatsııa» JShS bas dırektory Vadım Zverkov depýtattardy kompanııa qyzmeti men dári-dármekterdi satyp alýǵa bólinetin qarjylardy ońtaıly ári tıimdi paıdalaný jumystarynyń qorytyndylary týraly habardar etti. «Densaýlyq saqtaý mınıstrligi bekitken tek shekteýli baǵalardyń ózinen 4,5 mlrd.teńge únemdeldi»,- dedi kompanııa jetekshisi. Onyń aıtýynsha, dári-dármekterdi satyp alýdyń jańa júıesine sáıkes, satyp alýdy júzege asyrýǵa qatysty protsedýralarǵa qatysý úshin barlyq áleýetti jetkizýshilerge teń múmkindikter berilgen. Atap aıtqanda, áleýetti jetkizýshiler arasynda shynaıy básekelestikti qamtamasyz etý sharalary, satyp alý úrdisiniń jarııaly jáne móldir bolýy 2009 jyly ótkizilgen satyp alýlardaǵy baǵadan áldeqaıda tómen baǵalarǵa qol jetkizýge múmkindik berdi.
Talqylaý barysynda Densaýlyq saqtaý mınıstri J.Dosqalıev jańa áleýmettik-ekonomıkalyq jaǵdaılardaǵy dári-dármek saıasatyn júrgizý, otandyq farmatsevtıka salasyn damytý men dári-dármek naryǵyna biryńǵaı dıstrıbıýtordy engizý máselelerine keńinen toqtalyp ótti. Salalyq mınıstrliktiń basshysy men «SK-Farmatsııa» JShS jetekshisi depýtattardyń emdik-profılaktıkalyq mekemelerdegi dári-dármekterdiń tapshylyǵyna, sapaly dármekterdi ýaqytyly satyp alý men ony jetkizýge, sonymen qatar, ómirlik mańyzy bar keıbir dári-dármekter baǵalarynyń qymbattaýymen baılanysty kókeıtesti suraqtaryna jaýap berdi.
