Senat depýtattary birkúndik jalaqylaryn Shyǵys Qazaqstanǵa aýdarady
ASTANA. QazAqparat - Parlament Senatynyń depýtattary birkúndik jalaqylaryn Shyǵys Qazaqstan oblysy aýmaǵynda sý tasqynynan zardap shekkenderge aýdarady, dep habarlaıdy QazAqparat.
«Shyǵys Qazaqstan oblysynda turǵyndar sý tasqynynan zardap shegýde. Óńirde qardyń az túsýinen topyraq qabaty 1,5-2 metr tereńdikke deıin toń bolyp qatqan. Sonymen qatar onyń kúrt erýi men tolassyz jaýyn-shashyn saldarynan ózenderde sý deńgeıi shamadan tys kóterilip, bes qala ( Aıagóz, Óskemen, Rıdder, Shemonaıha, Semeı) jáne 12 aýdan sý tasqynyna ushyrady. Osyǵan baılanysty birqatar aýdandarda tótenshe jaǵdaı jarııalandy. Jergilikti atqarýshy organ tabıǵı apatqa baılanysty tıisti sharalar qabyldaýda. Barlyq shyǵysqazaqstandyqtar jumylyp, tilsiz jaýǵa qarsy belsene kúresip jatyr. Alaıda tehnıka men adam kúshi barynsha jumyldyrylýyna qaramastan, oryn alyp otyrǵan jaǵdaı qosymsha qarjylaı qoldaýdy qajet etedi», - dep toqtaldy senator Dúısenǵazy Mýsın Senattyń jalpy otyrysynda.
Osy oraıda D. Mýsın bul máselede aýyzbirshilik pen aǵaıynshylyqty, qamqorlyq pen kómek kórsetý qajettigin atap ótti.
«Áriptester, sý tutqynynda qalǵan jáne tabıǵı apat saldarynan úlken qıyndyqtarǵa kez bolǵan Shyǵys Qazaqstan oblysyndaǵy otandastarymyzǵa kómek qolyn sozyp, 1 kúndik jalaqymyzdy aýdarýdy usynamyn. Osylaısha, biz qıyn ýaqytta qolymyz jetpese de, kóńilimiz ben júregimiz osy óńir halqymen birge ekenin kórsetip, usynysymdy qoldaýlaryńyzdy suraımyn», - dedi depýtat.
Óz kezeginde Senat tóraǵasy Qasym-Jomart Toqaev senatordyń bul usynysyna qoldaý bildirdi.
«Qarsylyq bolmaıdy ǵoı. Jaqsy usynys. Sheshim qabyldandy dep esepteımiz. Bul bizdiń Shyǵys Qazaqstan oblysyndaǵy sý tasqynynan zardap shekken azamattarǵa kórsetken kómegimiz bolsyn», - dedi Toqaev.
