Senat depýtattary AShM Sý resýrstary komıtetiniń basshylyǵymen kezdesti
ASTANA. 26 qazan. QazAqparat - Búgin Parlament Senatynyń Agrarlyq máseleler jáne qorshaǵan ortany qorǵaý komıteti depýtattarynyń Aýyl sharýashylyǵy mınıstrligi Sý resýrstary komıtetiniń basshylyǵymen kezdesýinde 2002-2010 jyldarǵa arnalǵan «Aýyzsý» memlekettik baǵdarlamasy talqylandy.
Talqylaýǵa Senat depýtattary, Senat Apparatynyń, Aýyl sharýashylyǵy mınıstrliginiń, Qurylys jáne turǵyn úı-kommýnaldyq sharýashylyq isteri agenttiginiń, Tabıǵı monopolııalardy retteý jónindegi agenttiktiń, Soltústik Qazaqstan, Ońtústik Qazaqstan oblystarynyń, Astana qalasy ákimdiginiń jaýapty qyzmetkerleri, sýmen qamtý kásiporyndarynyń ókilderi qatysty.
Talqylaýdy asha kelip, Agrarlyq máseleler jáne qorshaǵan ortany qorǵaý komıtetiniń tóraǵasy Bolat Jylqyshıev 2002-2010 jyldarǵa arnalǵan «Aýyzsý» memlekettik baǵdarlamasyn iske asyrý nátıjeleri týraly qysqasha áńgimeledi.
Kezdesý barysynda bul maqsatqa memleket bıýdjetinen 205,4 mıllıard teńgeden asa qarjy bólingeni, uzyndyǵy 12935 shaqyrym aýyzsý qubyrynyń jelisi iske qosylǵany aıtyldy. Shalǵaıdaǵy 3417 aýyl men selo taza sýymen qamtamasyz etildi.
Senator sondaı-aq 2011-2020 jyldarǵa arnalǵan «Aqbulaq» baǵdarlamasyn júzege asyrý barysyna nazar aýdara otyryp, burynǵy baǵdarlamalardy oryndaý kezinde anyqtalǵan jetispeýshilikterdi respýblıkalyq mańyzy bar Astana jáne Almaty qalalaryn sýmen qamtamasyz etýde eskerý qajettigin atap ótti.
Kezdesýde Aýyl sharýashylyǵy mınıstrliginiń Sý resýrstary komıtetiniń tóraǵasy A.Orman, Qurylys jáne turǵyn úı-kommýnaldyq sharýashylyq isteri agenttigi tóraǵasynyń orynbasary S.Dembaı jáne Tabıǵı monopolııalardy retteý jónindegi agenttik tóraǵasynyń orynbasary Q.Smaǵulov sóz sóılep, depýtattardyń saýaldaryna jaýap berdi.
Kezdesýdi qorytyndylaǵan Agrarlyq máseleler jáne qorshaǵan ortany qorǵaý komıtetiniń tóraǵasy B.Jylqyshıev 2002-2010 jyldarǵa arnalǵan taza aýyzsý jónindegi memlekettik baǵdarlamany júzege asyrýǵa teris áser etken olqylyqtarǵa «Aqbulaq» baǵdarlamasyn júzege asyratyn qurylymdar basshylarynyń nazaryn aýdaryp, osy sala boıynsha ortalyq jáne jergilikti atqarýshy organdar, ınvestorlar men ǵylymı ınstıtýttar jáne úkimettik emes sektor arasyndaǵy ózara is -qımyldy úılestirý qajettigin atap ótti.
2011-2020 jyldarǵa arnalǵan «Aqbulaq» baǵdarlamasyn iske asyrýǵa qatysty depýtat osy jumystardyń tıimdiligine baǵyttalǵan, atap aıtqanda, oblys ákimdikteri janynan sýmen qamtamasyz etýge jaýap beretin kásiporyndardy qurý jáne qajetti ınfraqurylym qalyptastyrý, sýdy paıdalaný nysandarynyń qurylysy men paıdalanatyn kásiporyndardyń jabdyqtalýy, halyqaralyq standarttarǵa sáıkes normatıvtik-qurylys qujattarymen qamtamasyz etý máseleleri boıynsha usynystar aıtty.
