Senat depýtattary ań men qustyń 300-den astam túriniń tolyq joıylý qaýpine alańdaýly
ASTANA. QazAqparat - Qazaqstanda ań men qustyń 300-den astam túriniń tolyq joıylý qaýpi tónip tur. Bul jaıynda QR Parlamenti Senatynyń depýtaty Murat Baqtııarulynyń áriptesteri atynan el Premer-Mınıstri Baqytjan Saǵyntaevqa joldaǵan depýtattyq saýalynda aıtylǵan, dep habarlaıdy QazAqparat.
«Qazaqstan - aıaýly mekenimiz. Elimizde tabıǵı baılyq mol. Sonyń bir kórsetkishi ań men qustar. Osy ýaqytqa deıin olardyń kóbisi Qyzyl kitapqa engizildi. Memleket tarapynan qorǵalatyn tabıǵı qoryqtardyń kólemi 23 mln gektar aýmaqty, al ańshylyq sharýashylyqtardyń ıeligindegi aýmaq 118 mln gektardy quraıdy», - dedi senator.
Onyń aıtýynsha, qorshaǵan ortany qorǵaý baǵytynda memlekettik baǵdarlamalarymyz da barshylyq. Alaıda, bul máselede dabyl qaǵarlyq jaǵdaı kóptep oryn alýda.
«Resmı málimetke súıensek, jerimizde mekendeıtin ań men qustyń 300 - den astam túri tolyq joıylyp ketý qaýpiniń aldynda tur. 2015 jylmen salystyrǵanda, 2016 jyldyń kókteminde Qazaqstandaǵy qustar sany 2 mln-ǵa kemip ketken. Osyǵan oraı, Aýyl sharýashylyǵy mınıstrliginiń Orman sharýashylyǵy jáne janýarlar dúnıesi komıteti 2017 jylǵy 16 aqpan men 14 maýsym aralyǵynda kóktemgi ań-qus aýlaý maýsymyna tyıym saldy. «Komıtet sheshimi durys emes, janýarlar dúnıesine ańshylardyń esh qııanaty joq» dep, qaptaǵan ańshylyq maqsattaǵy sharýashylyqtar ashyq hat jazyp, óre túregelýde. Derekke súıensek, sońǵy birneshe jyl kóleminde 300-deı ańshylyq şarýashylyǵy qurylǵan eken. Paıda tappasa, osynshama sharýashylyq qurylar ma edi?»,- dedi Baqtııaruly Úkimet basshysy atyna joldaǵan depýtattyq saýalda.
