Senat depýtattary zań qabyldarda halyqtyń pikirin eskeredi — Maksım Spotkaı
ASTANA. KAZINFORM — Senattaǵy zań qabyldaý protsesinde halyqtyń oı-pikiri eskeriledi jáne depýtattarmen birge bilikti zańgerler men sarapshylar bólimi tyǵyz jumys isteıdi.
QR Parlament Senaty apparatynyń basshysy Maksım Spotkaı Senat qyzmetkerleriniń jumysy týraly, sondaı-aq qoǵam belsendileriniń suranysy jaıly tolyǵyraq aıtyp berdi.
Onyń aıtýynsha, Senatty óńirlerdiń múddesin qorǵaıtyn palata dep qarastyrýǵa bolady. Eń mańyzdy fýnktsıonal — zań shyǵarý protsesinde halyqtyń úni men pikiri mindetti túrde eskeriledi.
— Bizdiń senatorlar óńirlerdi aralap, halyqpen kezdesedi, Parlament qabyrǵasynda jeke azamattardy qabyldaıdy. Máselen, byltyr 400-den astam azamat kelip, óz usynystaryn aıtqan. Munyń jańa tsıfrlyq tetikteri de bar. Qazir e-Parlament platformasyn jetildirý boıynsha Májilistegi áriptestermen birge jumys istep jatyrmyz. Bul úlken ári jańa júıe. Keleshekte e-Gov portaly sııaqty suranysqa ıe júıege aınalaryna úmittenemiz, — dedi Maksım Spotkaı Jibek Joly telearnasyna bergen suhbatynda.
Sonymen birge, Senat depýtattaryna e-otinish portaly arqyly ótinishter kelip túsedi. Onda da belgilengen merzimde jaýap beriledi nemese basqa memlekettik organdarǵa jiberiledi.
— Máselen Senatta 2026-2028 jyldarǵa arnalǵan úsh jyldyq bıýdjet týraly zań qaraldy. Bizdiń senatorlar engizgen barlyq túzetý óńirlerde iske asyp jatqan jobalarǵa qatysty boldy. Májilis te Senattyń qosymsha qarajat bólý usynysymen kelisti. Bul da senatorlardyń óńirlerde jınaqtaǵan usynystardy eskerýiniń naqty bir nátıjesi. Byltyr joǵary palata 104 zań jobasyn qabyldady. Árbir zańnyń artynda úlken jumys tur, azamattardyń taǵdyryna áser etetin qujattar bolǵandyqtan, óte muqııat qaralady, — deıdi apparat basshysy.
Sondyqtan apparatta analıtıkalyq bólim men bilikti zańgerler jumys isteıdi. Olar kez kelgen normany senatorlarmen birge muqııat qaraıdy.
— Senatorlar da óziniń ómirlik tájirıbesi men bilimine súıenedi. Degenmen, jasandy ıntellekt, tsıfrlandyrý, klımattyń ózgerýi, ekologııanyń ózgerýi sekildi keıbir salalar — kúrdeli ári jańa baǵyttar. Qazaqstanda ǵana emes, jalpy álemde sarapshylar kóp emes. Osy aıda Jasandy ıntellekt týraly zańdy qaradyq, keıbir ózgerister engizip, Májiliske qaıtardyq. Keıin oǵan Prezıdentimiz qol qoıdy. Senatorlar árdaıym ár salanyń mamandaryn shaqyryp, birge talqylaıdy. Demek, zań shyǵarý protsesin joǵary deńgeıde ótkizip jatyrmyz deýge bolady, — dedi Maksım Spotkaı.
Bul rette qoǵam belsendileriniń oı-pikiri de zań qabyldaý protsesine yqpal etýi múmkin.
— Byltyr kóshi-qon týraly zańdy qaradyq. Zańda qandastarǵa qatysty biraz norma boldy jáne olar úlken rezonans týdyrdy. Sondyqtan Senatqa birneshe hat keldi, depýtattar qoǵam belsendilerin arnaıy qabyldap, usynymdaryn tyńdady. Osylaısha, qujatqa tolyqtyrý engizip, Májiliske qaıtardyq. Taǵy bir qyzý talqy týdyrǵany — turmystyq zorlyq-zombylyq týraly zań boldy. Shynymen de áleýmettik jelide, BAQ-ta bul traly kóp materıal shyqty. Tek qana osy zań boıynsha ata-analar men túrli qaýymdastyqtardan 100-den astam ótinish kelip tústi. Olardyń keı usynystaryn eskerdik, keı normalar boıynsha durys aqparat pen túsinikteme berdik. Kez kelgen zańdy qabyldarda qoǵam belsendilerimen, sarapshylarmen aqyldasamyz, — dedi Senat ókili.
Memleket basshysy reformanyń mán-mańyzy aıryqsha ekenin eskere otyryp, ony talqylaýǵa bir jyl ýaqyt kerek dep oılaıtynyn jetkizdi.
Májilistiń qazirgi quramy barlyq zańdyq rásim aıaqtalǵansha óz isimen aınalysa beredi. Senat jalpyulttyq referendýmnyń qorytyndysy shyǵyp, jańa Parlament saılaýy ótkenge deıin alańsyz jumys isteıdi. Al saıası partııalardyń básekeli tartysqa daıyndalýyna ýaqyty bolady.
Buǵan deıin Senat tóraǵasy Máýlen Áshimbaev parlamenttik reforma týraly pikir bildirgen edi.
Memleket basshysy bıylǵy Joldaýynda bir palataly Parlament qurý týraly bastama kóterdi.