Senat depýtaty: Jańa Ata zań jobasy — naǵyz halyqtyq Konstıtýtsııa

ASTANA. KAZINFORM — Konstıtýtsııalyq reforma — qoǵamnyń múddesinen jáne bolashaqtyń suranysynan týyndaıtyn tarıhı qajettilik. Bul týraly QR Parlamenti Senatynyń depýtaty Rýslan Rústemov «Referendým-2026» onlaın marafony barysynda málimdedi.

Onyń sózinshe, jańa Ata zań jobasynda memlekettik bıliktiń bastaýy halyq jáne egemendik ekeni, sondaı-aq, egemendiktiń tasymaldaýshysy da halyq ekeni aıqyn kórsetilgen. Mundaý jaýapkershilikti qalyń el de sezinip otyr.

— Kelip túsken on myńǵa jýyq ótinishtiń bárin de komıssııa músheleri qarastyryp, talqylady. Bir mysal keltireıin. Qyzylorda oblysynan Mahambetáli Ábdihamıtuly degen azamat gımnniń ornynan «ánuran» sózin qoldaný usynysyn engizip, onyń usynysy qoldaý tapty. Osyndaı jaıttar — halyqtyń Konstıtýtsııa jobasyn talqylaýda belsendilik tanytqanyn kórsetedi. Demek, halyq memlekettiń baǵytyn ózi aıqyndaıtynyn, egemendikke ózi tirek bolatynyn bilip otyr, — dedi depýtat.

Sol sebepti, R. Rústemov jańa Ata zań jobasyna «naǵyz halyqtyq Konstıtýtsııa» dep baǵa berdi.

Aıta keteıik, buǵan deıin preambýlanyń naqty ári jan-jaqty jazylǵany jóninde habarlaǵan edik.