Senat depýtaty turǵyn úıdegi ortaq múlikti zańsyz basyp alý derekteri kóbeıgenin aıtty
ASTANA. KAZINFORM – Senator Bekbol Orynbasarov óziniń depýtattyq saýalynda turǵyn úı qatynastary salasyndaǵy júıeli problemalar týraly aıtyp berdi.
Depýtattyń sózine qaraǵanda, zań buzý derekteri jappaı sıpat alyp barady jáne ol úılerdegi ortaq múlikti zańsyz ıelikten shyǵarý men ıemdenýge baılanysty bolyp otyr.
Ol tehnıkalyq qabattar men jertólelerdi keıin satý men óz betinshe qaıta jabdyqtaý jaǵdaılary jıi tirkelip jatqanyn, bul zańnama men turǵyndardyń quqyqtaryn óreskel buzatynyn atap ótti. Olardyń jobalyq qujattaryna qaramastan, jergilikti atqarýshy organdardyń kómegimen ony turǵyn úı nemese kommertsııalyq nysan retinde zańdastyrý tájirıbesi erekshe alańdatyp otyr.
- Bul menshik ıeleriniń mańyzdy ınjenerlik jelilerge, sorǵy stantsııalaryna jáne jylý qondyrǵylaryna qol jetkize almaýyna ákeledi. Mundaı áreket ǵımarattardy paıdalaný qaýipsizdigine tikeleı qaýip tóndiredi, tótenshe jaǵdaıdyń týyndaý qaýpin birneshe ese arttyrady. Sonyń nátıjesinde azamattardyń ómiri men densaýlyǵyna tikeleı qaýip tóndiredi. Sonymen qatar, zańsyz qaıta jobalaý turǵyn úı keshenderin jobalaý kezinde qarastyrylmaǵan kommýnıkatsııaǵa artyq aýyrtpalyq týǵyzady, - dedi senator Bas prokýrordyń atyna joldaǵan saýalynda.
Bekbol azamattardyń jergilikti organdar men prokýratýraǵa ótinishteri nátıje bermeıtinin, bul olardy respýblıkalyq deńgeıge júginýge májbúr etetinin atap ótti.
- Mundaı kelisimsharttardy jaramsyz dep taný jáne tehnıkalyq qabattardy, jertóleler men parkıngterdi sot organdary arqyly kondomınıýmǵa qaıtarý úshin prokýrorlyq áreket etý sharalaryn qabyldaý mańyzdy. Menshik ıeleri jınalystarynyń hattamalaryn burmalaǵany jáne ortaq múlikti zańsyz ıemdengeni úshin ákimshilik jáne qylmystyq jaýapkershilikti kúsheıtý týraly máseleni qarastyrý kerek, - dedi senator.
Budan buryn habarlanǵandaı, Qazaqstanda PIK pen MIB-tiń aı saıynǵy esepti usyný merzimderi ózgertildi.
