Senat depýtaty brýtsellez juqqan ettiń taralýyna alańdaýly
ASTANA. KAZINFORM — Senator Ernur Áıtkenov óziniń depýtattyq saýalynda Qazaqstandaǵy veterınarııa qyzmetiniń jaı-kúıine alańdaýshylyq bildirdi jáne salaǵa shuǵyl ári júıeli sheshimder qajettigin atap ótti.
Depýtat vaktsına men mal qulaǵyna salynatyn belgilerdi jetkizýdiń udaıy keshigýi sheshilmeıtin problemanyń biri ekenin aıtady. Bul másele maldy esepke alý men baqylaý tártibin, aldyn alý men dári egý merzimin buzady, ımmýndyq qorǵanysty álsiretedi jáne qaýipti ınfektsııanyń taralý qaýpin arttyrady.
Al vaktsına kóbinese mal ıesi esebinen satyp alynady, shyǵý tegi, sapasy men tirkelýine baqylaý jasalmaıdy, tıimdilik monıtorıngi júrgizilmeıdi.
— Brýtsellezdiń malǵa taralýy epıdemııalyq ahýalǵa, adamdardyń aýyrýyna yqpal etedi, bul múgedektikke ákeletin emdelýi qıyn aýrý. Aýrý mal men onyń eti juqtyrýdyń negizgi kózi bolyp sanalady. Sońǵy 3 jylda Qazaqstanda 2 myńǵa jýyq adam brýtsellez aýrýyna shaldyqty. Sanıtarlyq maqsatta soıylyp, satylǵan etke baqylaýdyń bolmaýy qaýipti kúsheıtedi. Qoldanystaǵy tártipke sáıkes, et PTR taldaý nátıjesin alǵansha satylymǵa shyǵyp ketýi múmkin. Fermerlik qaýymdastyqtar mundaı etti deldaldar arqyly satyp jiberý jaǵdaılary bolatynyn rastaıdy, bul sanıtarlyq qaýipsizdikke tikeleı qaýip tóndiredi, — dedi Ernur Áıtkenov Senat otyrysynda.
Sonymen birge, senator aýyldyq jerlerde veterınarııa ınfraqurylymy jetispeıtinin atap ótti. 2100-den astam aýyldyq okrýgtiń 30%-ynda ǵana veterınarlyq beket bar, olardyń kópshiligi nashar jabdyqtalǵan.
Tirkelgen 1 164 soıý alańynyń 497-si ǵana jumys isteıdi, bul fermerlerdi veterınarlyq baqylaýsyz jáne sanıtarlyq normalardy buzyp, maldy aýlada soıýǵa májbúr etedi. Materıaldyq-tehnıkalyq baza eskirgen, jabdyq pen kólik 2013 jyldan beri jańartylmaǵan, bul jumystyń tıimdiligin tómendetedi.
— Vaktsına men mal qulaǵyna salynatyn belgini ortalyqtandyryp satýdy uıymdastyrýdy, brýtsellezge qarsy vaktsına satyp alýdy qarjylandyrýdy usynamyz. Brýtsellezge qarsy vaktsınatsııany baqylaýdyń ǵylymı negizdelgen tujyrymdamasy men tártibin ázirleý qajet. Etti PTR-taldaý nátıjesin alǵansha satýǵa tyıym salyp, sanıtarlyq soıý tártibin jańartý, májbúrli soıýdan keıin et qozǵalysyn baqylaýdy kúsheıtý qajet. Aýyldyq okrýgterdegi veterınarııalyq beket pen sanıtarııalyq soıý oryndary jelisin keńeıtý, malmen qaýipsiz jumys isteý úshin veterınarııa beketterin mamandandyrylǵan úı-jaımen, bólimdermen jáne ustaǵysh jabdyqpen tolyqtaı qamtamasyz etý usynylady, — dedi senator.
Buǵan deıin Ertis-Baıan óńirinde 1,5 myńǵa jýyq qara maldan brýtsellez anyqtalǵany habarlanǵan edi.