Senat depýtaty aýyldy damytý baǵdarlamasyn synǵa aldy
ASTANA. KAZINFORM – BUU boljamy boıynsha 2050 jylǵa qaraı ýrbanızatsııa 70 paıyzǵa jetýi múmkin. Qazaqstandaǵy qala halqynyń úlesi de ósip keledi. Senator Janbolat Jórgenbaev óziniń depýtattyq saýalynda aýylda ómir súrýge arnalǵan keshendi jaǵdaı jasaý qajet ekenin aıtty.
Depýtat eńbek naryǵy men áleýmettik ınfraqurylymdy damytý turǵysynan óńirler de, megapolıster de qazir mundaı kóshi-qonǵa daıyn emes ekenin aıtty. J.Jórgenbaev aýyldyń áleýmettik ınfraqurylymyn jetildirý negizinde elimizdiń qaýipsizdigin qamtamasyz etý qajet dep sanaıdy.
«Aýyl – el besigi» baǵdarlamasy aıasynda 2019-2023 jyldary respýblıkalyq bıýdjetten 524 mlrd teńge bólinip, 1,5 myńnan asa aýyldy eldi mekende 5 myńnan astam joba iske asyryldy. Degenmen onyń nátıjesi kóńil kónshitpeı otyr», - dedi depýtat Úkimet basshysy Oljas Bektenovtyń atyna joldaǵan saýalynda.
Senatordyń pikirinshe, Úkimet qazir aýyldarǵa jaǵdaı jasap, aýyl sharýashylyǵyna ǵana emes, aýyl turǵyndarynyń mádenı ómirine, densaýlyq saqtaý júıesi men ınfraqurylymǵa da nazar aýdarýy tıis.
«Shekara mańyndaǵy aýyldardaǵy bıýdjettik ınvestıtsııalyq jobalardy qarjylandyrýǵa baǵyttalǵan bólek bıýdjettik baǵdarlama ashý kerek. Sonymen qatar, qoldanystaǵy zańnamada belgilengen aýyldyq ústemaqydan tys memlekettik shekaraǵa 50 km jaqyn ornalasqan aýyl qyzmetkerleri úshin laýazymdyq jalaqyǵa 50 paıyzǵa deıingi mólsherde ústemaqy belgileý múmkindigin qarastyrý kerek», - dedi depýtat.
