Senat damýǵa resmı kómek jónindegi zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda palata depýtattary «Damýǵa resmı kómek týraly» zań jobasyn talqylady. Qujatqa senatorlar tarapynan birqatar túzetýler engizilgendikten zań jobasy Májiliske qaıtaryldy.
Zań jobasynyń negizgi maqsaty áriptes elderdiń áleýmettik-ekonomıkalyq damýyna járdemdesý maqsatynda Qazaqstannyń ol elderge damýǵa resmı kómek kórsetýi protsesinde týyndaıtyn qatynastardy quqyqtyq retteý bolyp tabylady. Sonymen qatar, zań jobasynda negizgi uǵymdardyń aıqyndamalary ashyp kórsetiledi, damýǵa resmı kómektiń maqsattary, mindetteri, qaǵıdattary men sektorlyq basymdyqtary belgilenedi. Qujatty qabyldaý damýǵa resmı kómektiń quqyqtyq negizin qalyptastyrýǵa, osy saladaǵy qyzmetti úılestirýdi jetildirýge, kómek kórsetýdi baqylaýǵa baǵyttalyp, elimizdiń halyqaralyq arenadaǵy róli men bedelin arttyrýǵa septigin tıgizedi.
QR Syrtqy ister mınıstri Erlan Ydyrysovtyń aıtýynsha, atalǵan qujat ulttyq zańnamada ǵana emes, TMD keńistiginde biregeı bolyp otyr. «Óıtkeni, TMD elderinde tek eki memlekette, Reseı men Ázerbaıjanda ǵana damýǵa resmı kómektiń júıesi bar, alaıda ol elderdiń ózinde tolyqqandy zań jumys istep turǵan joq. Al Qazaqstan óńirde bul baǵyttaǵy eń birinshi jumys isteıtin memleket bolyp otyr desek artyq emes. Sondyqtan da, zań jobasyn ázirleý barysynda álemdik tájirıbelerge súıendik», - deıdi Erlan Ydyrysov.
Zań jobasy boıynsha damýǵa resmı kómekti retteý júıesi naqty reglamentteledi. QR Úkimetiniń, ýákiletti organ retinde Syrtqy ister mınıstrliginiń damýǵa resmı kómek salasyndaǵy quzyreti aıqyndalady. Al osy saladaǵy Qazaqstannyń memlekettik saıasatyn iske asyrýǵa qatysatyn zańdy tulǵany Úkimet quratyn bolady.
Zań jobasyn talqylaý barysynda Senat tarapynan birqatar túzetýler engizilgen. Senator Birǵanym Áıtimovanyń sózine qaraǵanda, túzetýler negizinen redaktsııalyq naqtylaý sıpatynda bolyp otyr.
