Senat tsıfrlyq maınıngke qatysty zańdy maquldady

ASTANA. QazAqparat – Búgin Senattyń jalpy otyrysynda «Qazaqstan Respýblıkasyndaǵy tsıfrlyq aktıvter týraly» Zańy men oǵan ilespe qujattar maquldandy, dep habarlaıdy QazAqparat tilshisi.

Zań Qazaqstan Respýblıkasynda tsıfrlyq aktıvterdi shyǵarý jáne olardyń aınalymy jónindegi qyzmetti, tsıfrlyq maınıngti damytý úshin quqyqtyq baza jasaýǵa baǵyttalǵan.

Aıta keteıik, 19 qańtarda Senat bul qujattarǵa túzetýler engizip, olardy Májiliske qaıtaryldy.

Dál sol kúni tústen keıin Memleket basshysy Jetinshi saılanǵan QR Parlamentiniń Májilisin taratý jáne QR Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.

Sondyqtan Májilistiń taratylýyna qatysty Parlament fýntsııalaryn Senat atqarady.

Atap aıtqanda, Májilis qabyldaǵan Zańǵa mynadaı ózgerister engizý usynyldy:

- tsıfrlyq maınıng jónindegi qyzmetti júzege asyrýǵa arnalǵan lıtsenzııalardyń kishi túrleriniń ataýlaryn naqtylaý;

- tsıfrlyq maınerdiń qyzmetin jarnamalaýǵa qatysty normalardy alyp tastaý, óıtkeni olar «Jarnama týraly» Zańda jáne Ákimshilik quqyq buzýshylyq týraly kodekste kózdelgen;

- Zań normalaryn qoldanysqa engizý merzimderin naqtylaý.

Osy oraıda búgin Senattyń jalpy otyrysynda atalǵan zań men ilespe qujattardyń jekelegen baptary jańa redaktsııada maquldandy.

Zańnyń mindetteri:

- jańa termınologııany engizý (tsıfrlyq aktıv, tsıfrlyq aktıvter bırjasy, tsıfrlyq maınıng, tsıfrlyq maınıng derekterin óńdeý ortalyǵy);

- tsıfrlyq maınerler qyzmetin lıtsenzııalaý;

- tsıfrlyq maınıngtik pýldar qyzmetin júzege asyrý;

- salyq salý maqsatynda tsıfrlyq maınerler men tsıfrlyq maınıngtik pýldardyń kiristeri týraly málimetterdi usyný;

- tsıfrlyq aktıvter bırjalarynyń qyzmetin reglamentteý;

- tsıfrlyq aktıvter salasyndaǵy memlekettik baqylaý;

- Qazaqstan Respýblıkasynyń tsıfrlyq aktıvter salasyndaǵy zańnamasyn buzǵany úshin jaýaptylyq.