Senat bıýrosynyń otyrysynda Tóraǵa Parlament sessııasynyń ashylýy kezinde Elbasy N. Nazarbaevtyń depýtattardyń aldyna qoıǵan mindetterge toqtaldy

Q.Toqaev Senattyń negizgi qyzmeti elimizdiń 2020 jyldarǵa arnalǵan Strategııalyq josparyn zańnamalyq turǵyda qamtamasyz etý ekenin atap ótti. Tóraǵa «sessııany ashqan kezde Prezıdent N.Nazarbaev damýdyń basym baǵyttaryn júzege asyrý maqsatynda otyzdan astam zań jobalaryn Parlamenttiń osy sessııasynda qaraýǵa jáne qabyldaýǵa tapsyrma berdi», dedi jáne qazirgi kezde osy zań jobalarynyń jıyrmaǵa jýyǵy Parlamentte ekenin aıtty.

Zań shyǵarý jumystarynyń mańyzdy bóligi, Q.Toqaevtyń aıtýynsha, respýblıkalyq bıýdjetke ózgerister engizý bolyp tabylady. Úsh jyldyq bıýdjetke ózgerister qazan-qarasha aılarynda engiziletin bolady, dep atap ótti Tóraǵa.

Palata tóraǵasy sondaı-aq damý baǵdarlamasyna arnalǵan bıýdjet qarjysyn tıimdi jáne únemdi oryndalýyna parlamenttik baqylaýdy kúsheıtý qajettigi týraly da atap ótti.

Bıýro otyrysynda Parlament Májilisi maquldaǵan zań jobalary palata komıtetteri arasynda bólinip berildi.

Atap aıtqanda, «Ýaqytsha ákelý týraly konventsııany ratıfıkatsııalaý týraly» jáne «Qazaqstan Respýblıkasy men Eýropa Investıtsııalyq Banki arasyndaǵy Eýropa Investıtsııalyq Bankiniń Qazaqstan Respýblıkasyndaǵy qyzmetin retteıtin negizdemelik kelisimdi ratıfıkatsııalaý týraly» zań jobalary Qarjy jáne bıýdjet komıtetine berildi.

Sondaı-aq 23 qyrkúıekte bolatyn palatanyń kezekti otyrysynyń kún tártibin qalyptastyrý týraly komıtetterdiń usynystary qaraldy. Aldaǵy palata otyrysynda «Qazaqstan Respýblıkasynyń keıbir zańnamalyq aktilerine azamattyq zańnamany jetildirý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobalary birinshi oqylymda qaralatyn boldy.