Senat bıýrosynda zań jobalary bólindi
ASTANA. 30 jeltoqsan. QazAqparat - Palata Tóraǵasy Qasym-Jomart Toqaev tóraǵalyq etken Qazaqstan Respýblıkasy Parlamenti Senatynyń bıýrosy komıtetterge Májiliste maquldanǵan zań jobalaryn bóldi.
Halyqaralyq qatynastar, qorǵanys jáne qaýipsizdik komıtetine TMD-ǵa qatysýshy memleketter kúshteriniń áýe shabýylyna qarsy qorǵanys jónindegi kezekshileriniń áýe kemesin basyp alý (ushyryp áketý) týraly aqparatty alǵan kezdegi is-qımyldaryn uıymdastyrý týraly kelisimdi ratıfıkatsııalaý týraly zań jobasy berildi. Sondaı-aq osy komıtetke Ujymdyq qaýipsizdik týraly shart uıymyna múshe memleketterdiń aýmaqtaryna áskerı ınfraqurylym obektilerin ornalastyrý týraly hattamany ratıfıkatsııalaý týraly qujat ta berildi.
Konstıtýtsııalyq zańnama, sot júıesi jáne quqyq qorǵaý organdary komıteti jol júrisi týraly zań jobasyna jáne soǵan sáıkes ilespe zań jobasyna bas komıtet bolyp belgilendi.
Zańnamaǵa qaıta qurylymdaýdy júzege asyrǵan ekinshi deńgeıdegi bankterdi odan ári damytý máselesi boıynsha ózgerister men tolyqtyrýlar engizý týraly zań jobasy Qarjy jáne bıýdjet komıtetine berildi.
