Senat Bıýrosynda Úkimet engizgen zań jobalary bólindi
ASTANA. QazAqparat - Senat Bıýrosy 2016 jylǵy 11 aqpanda bolatyn joǵarǵy Palatanyń kezekti otyrysynyń kún tártibin kelisti.
Senatorlar 2009 jylǵy 9 maýsymdaǵy Eýrazııalyq ekonomıkalyq qoǵamdastyqtyń Daǵdarysqa qarsy qoryn qurý týraly shartqa ózgerister engizý týraly hattamany jáne 2009 jylǵy 9 maýsymdaǵy Eýrazııalyq ekonomıkalyq qoǵamdastyqtyń Daǵdarysqa qarsy qorynyń qarajatyn basqarý týraly kelisimge ózgerister engizý týraly hattamany; Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Vetnam Sotsıalıstik Respýblıkasy arasyndaǵy erkin saýda týraly kelisimdi; 1995 jylǵy 20 qańtardaǵy Qazaqstan men Reseı úkimetteri arasyndaǵy Reseı Federatsııasy Qorǵanys mınıstrliginiń (obektileri men urys alańdary Qazaqstan aýmaǵynda ornalasqan) 929 Memlekettik ushý-synaq ortalyǵyn paıdalaný tártibi týraly kelisimge ózgerister men tolyqtyrýlar engizý týraly hattamany; Qazaqstan men Reseı Úkimetteri arasyndaǵy 1996 jylǵy 18 qazandaǵy Qazaqstan men Reseı Úkimetteri arasyndaǵy Qazaqstan aýmaǵyna ornalasqan Reseıdiń 929 Memlekettik ushý-synaq ortalyǵynyń obektileri men jaýyngerlik alańdaryn jaldaý týraly shartqa ózgerister engizý týraly hattamany; Qazaqstan men Ulybrıtanııa arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly zań jobalaryn talqylaıdy.
Bıýroda sondaı-aq Úkimet engizgen zań jobalary Senattyń turaqty komıtetteri arasynda bólindi.
Konstıtýtsııalyq zańnama, sot júıesi jáne quqyq qorǵaý organdary komıtetine Azamattyq nemese saýda isteri boıynsha shetelde dáleldemelerdi alý týraly konventsııany ratıfıkatsııalaý týraly jáne Balalarǵa alımentterdi jáne otbasyn kútip-baǵýdyń basqa da nysandaryn óndirip alýdyń halyqaralyq tártibi týraly konventsııany jáne Alımenttik mindettemelerge qoldanylatyn quqyq týraly hattamany ratıfıkatsııalaý týraly zań jobalaryn júrgizý tapsyryldy.
