Senat Bıýrosynda 2014 jylǵy birinshi toqsandaǵy jumys qorytyndylandy
ASTANA. QazAqparat - Búgin Qasym-Jomart Toqaevtyń tóraǵalyq etýimen Qazaqstan Respýblıkasy Parlamenti Senaty Bıýrosynyń otyrysy boldy.
Bıýro músheleri Palatanyń aldaǵy 10 sáýirde bolatyn otyrysynyń kún tártibin qarady. Otyrysta, atap aıtqanda, 1999 jylǵy 3 jeltoqsanda Pekınde qabyldanǵan Ozon qabatyn buzatyn zattar jónindegi Monreal Hattamasyna Túzetýlerdi ratıfıkatsııalaý týraly jáne Qazaqstan men Qytaı arasyndaǵy Qorǵas ózeninde «Dostyq» ortaq birlesken sý torabyn salýdaǵy yntymaqtastyq týraly úkimetaralyq kelisimdi ratıfıkatsııalaý týraly zań jobalary qaralatyn boldy. Sondaı-aq Qazaqstan Respýblıkasynyń Ákimshilik quqyq buzýshylyq týraly kodeksine ózgeris engizý týraly zań jobasyn (birinshi oqylymda) qara josparlanýda.
Bıýroda Májiliste maquldanǵan zań jobalaryna Senattyń bas komıtetteri belgilendi. Ekonomıkalyq damý jáne kásipkerlik komıtetine Eýrazııa ekonomıkalyq qoǵamdastyǵyna múshe memleketterdiń eksporttyq baqylaýynyń biryńǵaı tártibi týraly kelisimniń kúshin joıý týraly zań jobasy berildi. Halyqaralyq qatynastar, qorǵanys jáne qaýipsizdik komıtetine Qazaqstan men Ózbekstan arasyndaǵy strategııalyq áriptestik týraly shartty ratıfıkatsııalaý týraly zań jobasy berildi.
Bıýro músheleri Qazaqstan Respýblıkasy Parlamenti Senatynyń depýtattaryn halyqaralyq parlamenttik uıymdarǵa jáne Parlament Senatynyń shet memleketterdiń parlamentterimen óńirlik yntymaqtastyq toptaryna jiberý jónindegi usynystaryn qarady jáne maquldady.
Otyrys barysynda Senat Apparatynyń Basshysy Aleksandr Sýdın Apparattyń 2014 jylǵy birinshi toqsany jumysynyń qorytyndylary boıynsha habardar etti.
Kezdesý sońynda Senat Tóraǵasy, «Nur Otan» partııasy Saıası keńesiniń Bıýro múshesi Q.Toqaev birqatar senatorlarǵa - partııa múshelerine jańa úlgidegi partııa bıletterin tabys etti.
