Senat Bıýrosy palatanyń aldaǵy otyrysynyń kún tártibin bekitti
ASTANA. 29 sáýir. QazAqparat - Búgin Qazaqstan Respýblıkasy Parlamenti Senatynyń Tóraǵasy Qaırat Mámıdiń jetekshilik etýimen Palata Bıýrosynyń otyrysy boldy. Bıýroda Parlament Májilisinde maquldanǵan zań jobalary Senattyń turaqty komıtetteri men Apparatqa berildi. Bul týraly Senattyń baspasóz qyzmetinen habarlandy.
Atap aıtqanda, Tabıǵatty paıdalaný jáne aýyldyq aýmaqtardy damytý komıteti «Qazaqstan men Halyqaralyq Qaıta Qurý jáne Damý Banki (HQQDB) arasyndaǵy Qaryz týraly kelisimge Ońtústik-Batys avtomobıl joldaryn damytý jobasy: Batys Eýropa - Batys Qytaı halyqaralyq tranzıt dálizi túzetýlerge qatysty Qaryz týraly kelisim-hatty ratıfıkatsııalaý týraly» zań jobasyn pysyqtaý jónindegi bas komıtet bolyp belgilendi. Sonymen qatar, Konstıtýtsııalyq zańnama, sot júıesi jáne quqyq qorǵaý organdary komıtetine «Qazaqstan men Ispanııa Koroldigi arasyndaǵy ustap berý týraly shartty, sondaı-aq sottalǵan adamdardy berý týraly shartty ratıfıkatsııalaý týraly zań jobalaryn pysyqtaý tapsyryldy. Budan bólek, Áleýmettik-mádenı damý komıteti «Qazaqstan Respýblıkasynda zeınetaqymen qamsyzdandyrý týraly» zań jobasy jáne elimizdiń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly zań jobasy boıynsha bas komıtet bolyp belgilendi. Al Konstıtýtsııalyq zańnama, sot júıesi jáne quqyq qorǵaý organdary komıteti elimizdiń keıbir zańnamalyq aktilerine ekonomıkalyq qyzmet salasyndaǵy qylmystardy odan ári qylmystyq sıpattan aryltý máseleleri boıynsha ózgerister men tolyqtyrýlar engizý týraly zań jobasy boıynsha bas komıtet boldy.
Bıýroda ústimizdegi jylǵy 2 mamyrda bolatyn Senattyń kezekti otyrysynyń kún tártibi de talqylandy. Otyrysta birqatar halyqaralyq qujattardy ratıfıkatsııalaý týraly zań jobalaryn qaraý josparlandy. Atap aıtqanda, QR men HQQDB arasyndaǵy Qaryz týraly kelisimge (Ońtústik-Batys avtomobıl joldaryn damytý jobasy: Batys Eýropa - Batys Qytaı halyqaralyq tranzıt dálizi) túzetýlerge qatysty Qaryz týraly kelisim-hat; QR men HQQDB arasyndaǵy Qaryz týraly kelisim (Shyǵys-Batys avtomobıl joldaryn damytý jobasy (Almaty-Qorǵas ýchaskesi): Batys Eýropa - Batys Qytaı halyqaralyq tranzıt dálizi) qaralady.
Senattyń otyrysynda sondaı-aq ustap berý týraly jáne sottalǵan adamdardy berý týraly Ispanııamen eki kelisim de talqyǵa túsetin bolady.
