Senat Bıýrosy palatanyń aldaǵy otyrysynda talqylanatyn máselelerdi naqtylady
ASTANA. QazAqparat - Búgin spıker Qasym-Jomart Toqaevtyń tóraǵalyq etýimen Senat Bıýrosynyń otyrysy ótip, onda Palatanyń 29 qazanda bolatyn kezekti otyrysynyń kún tártibi kelisildi. Depýtattar on tórt zań jobasyn qaraýdy josparlady. Bul týraly Senattyń baspasóz qyzmetinen habarlandy.
Bıýro usynysyna sáıkes, depýtattar qaraýyna Qazaqstan men Monako arasyndaǵy qylmystyq ister boıynsha ózara quqyqtyq kómek týraly shartty jáne Majarstanmen aradaǵy dál osyndaı shartty, sondaı-aq Serbııamen Investıtsııalardy ózara kótermeleý jáne qorǵaý týraly úkimetaralyq kelisimdi talqylaý shyǵarylatyn bolady.
Budan bólek, palata depýtattary «Aqparattandyrý týraly», «Mindetti áleýmettik medıtsınalyq saqtandyrý týraly», «Sybaılas jemqorlyqqa qarsy is-qımyl týraly», «Organıkalyq ónim óndirý týraly» zań jobalaryn jáne zańnamaǵa bilim berý máseleleri boıynsha túzetýlerdi talqylamaq. Osy zań jobalarynyń ilespe qujattary da birinshi oqylymda talqylanady dep josparlanǵan.
Budan bólek, Bıýro taıaýda Májilis maquldaǵan bes zań jobasyn Senattyń turaqty komıtetterine bóldi. Atap aıtqanda, Konstıtýtsııalyq zańnama, sot júıesi jáne quqyq qorǵaý organdary komıtetine «Qazaqstan Respýblıkasynyń Joǵary Sot Keńesi týraly» jáne sot júıesi men sýdıalarynyń mártebesi týraly Konstıtýtsııalyq zańǵa ózgerister men tolyqtyrýlar engizý týraly zań jobalary berildi. Qarjy jáne bıýdjet komıteti «Astana» halyqaralyq qarjy ortalyǵy týraly» Konstıtýtsııalyq zań jobasy boıynsha bas komıtet bolyp belgilendi. Ekonomıkalyq saıasat, ınnovatsııalyq damý jáne kásipkerlik komıtetine Qazaqstan men Halyqaralyq Qaıta Qurý jáne Damý banki arasyndaǵy qaryz týraly kelisimdi ratıfıkatsııalaý týraly zań jobasyn júrgizý tapsyryldy. Áleýmettik-mádenı damý jáne ǵylym komıteti múgedekterdiń quqyqtaryn qorǵaýmáseleleri boıynsha túzetýler jobasyn qaraıtyn boldy.
