Senat Bıýrosy palatanyń aldaǵy otyrysynda qaralatyn kún tártibin naqtylady
ASTANA. 4 naýryz. QazAqparat - Búgin Senat spıkeri Qaırat Mámıdiń tóraǵalyq etýimen Qazaqstan Respýblıkasy Parlamenti Senatynyń Bıýro otyrysy boldy. Bıýroda Parlament Májilisinde maquldanǵan zań jobalary Senattyń turaqty komıtetteri men Apparatyna berildi. Bul týraly palatanyń baspasóz qyzmetinen habarlandy.
Otyrysta Qarjy jáne bıýdjet komıteti «1993 jylǵy 24 jeltoqsandaǵy Ártúrli memleketterdiń sharýashylyq júrgizýshi sýbektileri arasyndaǵy sharýashylyq daýlardy qaraý kezindegi memlekettik bajdyń mólsheri men ony óndirip alý tártibi týraly kelisimge ózgerister engizý týraly hattamany ratıfıkatsııalaý týraly» zań jobasyn pysyqtaý jónindegi bas komıtet bolyp belgilendi.
Ekonomıkalyq damý jáne kásipkerlik komıteti «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimdi ratıfıkatsııalaý týraly» zań jobasy boıynsha bas komıtet bolyp belgilendi.
Osy komıtet «2010 jylǵy 9 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgerister engizý týraly hattamany ratıfıkatsııalaý týraly» zań jobasy boıynsha da bas komıtet boldy.
Bıýroda sondaı-aq, Senattyń 2013 jylǵy 7 naýryzda bolatyn kezekti jalpy otyrysynyń kún tártibi talqylandy. Aldaǵy beısenbi kúni joǵarydaǵy zań jobalaryn palata otyrysynda qarastyrý kózdelip otyr.
