Senat Bıýrosy depýtattardyń aımaqtarǵa saparyn qorytyndylady
ASTANA. 9 jeltoqsan. QazAqparat - Búgin Senat Tóraǵasy Qasym-Jomart Toqaevtyń jetekshilik etýimen Qazaqstan Respýblıkasy Parlamenti Senatynyń Bıýro otyrysy boldy. Onda komıtet tóraǵalary 28 qarasha men 7 jeltoqsan aralyǵyndaǵy depýtattardyń elimizdiń aımaqtaryna kezekti saparynyń qorytyndylaryn habardar etti. Bul týraly Senattyń baspasóz qyzmetinen habarlandy.
Senatorlar elimizdiń barlyq aımaqtaryndaǵy ónerkásip, aýyl sharýashylyǵy jáne áleýmettik nysandardy aralap, eńbek ujymdarymen kezdesti, jergilikti jerlerdegi azamattardy qabyldady. Sonymen qatar, depýtattar «Qazaqstan - 2050» strategııasyn iske asyrý jónindegi zań shyǵarý qyzmeti týraly áńgimelep, jergilikti turǵyndarmen áleýmettik jáne ekonomıkalyq memlekettik baǵdarlamalar aıasyndaǵy elimizdiń damýyndaǵy jáne jergilikti mańyzy bar kókeıkesti máselelerdi talqylady. Osyǵan oraı, Senat spıkeri depýtattardyń aımaqtarǵa barýy jáne jergilikti halyqpen júzdesý Parlament qyzmetiniń mańyzdy bóligi ekenin atap ótti. «Bul jumystardyń nátıjelerine zań shyǵarý úderisterin jetildirý barysynda zor mán beriletin bolady, dedi Q.Toqaev. Tóraǵa, sondaı-aq, Senattyń aldaǵy jylǵy sharalaryn sapaly josparlaý qajettigine nazar aýdardy. «Josparǵa usynylatyn is-sharalar qoǵamdaǵy asa mańyzdy máselelerdi talqylaýǵa baǵyttalýy tıis. Bas komıtetterdiń kóshpeli otyrystary da óńirlerdegi ózekti máselelermen tyǵyz baılanysty bolǵany jón dep sanaımyn», - dep atap ótti ol. Q.Toqaevtyń pikirinshe, parlamenttik tyńdaýlarda qaralatyn máseleler zańdardyń iske asyrylýymen jáne jalpyulttyq, óńirlik baǵdarlamalardyń, sondaı-aq memlekettiń ishki jáne syrtqy saıasatynyń túıindi baǵyttarymen tyǵyz baılanysta bolǵany abzal. «Halyqaralyq konferentsııalar elimizde atqarylýy tıis mańyzdy máselelermen jáne Elbasy N.Á. Nazarbaevtyń strategııalyq joldaýlarymen baǵyttas bolýy kerek», - dedi Q.Toqaev.
Budan bólek, Bıýro otyrysynda Senat komıtetterine Májilis maquldaǵan úsh zań jobasy bólinip berildi. Sondaı-aq, bıylǵy 12 jeltoqsandaǵy Senat otyrysynyń kún tártibin de talqylady. Palata otyrysynda alty zań jobasyn qaraý kózdelip otyr.
