Senat Bıýrosy aldaǵy jalpy otyrystyń kún tártibin bekitti
ASTANA. 17 maýsym. QazAqparat - Búgin Parlament Senatynyń Tóraǵasy Qaırat Mámıdiń jetekshilik etýimen Palata Bıýrosynyń otyrysy boldy. Bıýroda Senattyń turaqty komıtetteri men Apparatqa Parlament Májilisinde maquldanǵan zań jobalary berildi. Bul týraly Senattyń baspasóz qyzmetinen habarlandy.
Atap aıtqanda, Ekonomıkalyq damý jáne kásipkerlik komıteti memlekettik-jeke menshik áriptestiktiń jańa túrlerin engizýge baǵyttalǵan zań jobasy boıynsha bas komıtet bolyp belgilendi. Al Konstıtýtsııalyq zańnama, sot júıesi jáne quqyq qorǵaý organdary komıtetine azaptaýdyń jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrleriniń aldyn alýǵa baǵyttalǵan ulttyq aldyn alý tetigin jasaý máseleleri boıynsha ózgerister men tolyqtyrýlar engizilgen zań jobasy júkteldi.
Bıýroda, odan basqa, palatanyń bıylǵy 20 maýsymda bolatyn jalpy otyrysynyń kún tártibi de belgilendi. Otyrys barysynda Qazaqstan men Reseı úkimetteri arasyndaǵy memlekettik shekarasynda birlesken baqylaýdy júzege asyrý salasyndaǵy yntymaqtastyq týraly kelisimdi ratıfıkatsııalaý týraly, Qazaqstan men Eýropa Qaıta Qurý jáne Damý Banki arasyndaǵy Qaryz týraly kelisimdi ratıfıkatsııalaý týraly, sondaı-aq konstıtýtsııalyq zańdardaǵy konstıtýtsııalyq merzimderdi esepteý máselelerin qamtıtyn zań jobasy talqylanatyn bolady. Budan bólek, jetim balalardyń, ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etýge baǵyttalǵan zań jobasy men jańartylatyn energııa kózderin paıdalanýdy qoldaýǵa baǵyttalǵan qujat ekinshi oqylymda talqylanady.
Sondaı-aq otyrysta tóreliktiń jáne aralyq sottyń qyzmetin jetildirý máseleleri boıynsha ózgerister men tolyqtyrýlar engizý týraly zań jobasy boıynsha Májilis pen Senat arasyndaǵy kelispeýshilikterdi eńserý jónindegi kelisý komıssııasynyń usynystaryn qaraý da kózdelip otyr.
