Senat bıýdjetke qatysty qujatty Májiliske qaıtardy
«Bıylǵy 20 naýryzda ótken Parlament palatalarynyń birlesken otyrysynda mańyzdy sheshimder qabyldanyp, QR Prezıdenti osy zań jobasyna: astanamyzdyń ataýyn Nur-Sultan qalasyna ózgertý; jańa memlekettik organdy - QR Tuńǵysh Prezıdentiniń-Elbasynyń Keńsesin qurý; bıýdjet salasynyń jalaqysy tómen jumyskerleriniń jáne atqarýshy organdardyń sanattary tómen memlekettik qyzmetshileriniń jalaqysyn arttyrý merzimin bıylǵy 1 shildeden 1 maýsymyna aýystyrý bóliginde ózgerister men tolyqtyrýlar engizýdi qajet etetin birqatar tapsyrma berdi», - delingen Senattyń Qarjy jáne bıýdjet komıtetiniń qorytyndysynda.
Atalǵan tapsyrmalardy iske asyrý úshin 38 mlrd teńge qajet bolady. Olardy respýblıkalyq bıýdjet tapshylyǵynyń esebinen onyń nomınaldy mánin ulǵaıta otyryp jáne ІJÓ-ge qatysty mólsherin 2,1 paıyz deńgeıinde saqtaı otyryp kózdeý usynylady.
Esterińizge sala keteıik, jaqynda 1 maýsymnan bastap kimderdiń jalaqysy kóteriletini aıtylǵan edi.
Senattyń jalpy otyrysynda QR Qarjy mınıstriniń mindetin atqarýshy Berik Sholpanqulov Respýblıkalyq bıýdjet túsimderiniń naqtylanǵan boljamy 821 mlrd teńgege ulǵaıýymen 10 trln 569 mlrd teńgeni quraıtynyn atap ótti. Bul túsimder mynalardyń esebinen júrgiziledi: kedendik ákimshilendirýdi kúsheıtý nátıjesinde 200 mlrd teńge somasynda qosymsha kirister; Ulttyq qordan kepildendirilgen transfertti 250 mlrd teńgege ulǵaıtý; tikeleı ınvestıtsııalar qoryn qurýǵa Ulttyq qordan 370 mlrd teńge somasynda nysanaly transfert tartý nátıjesinde iske asyrylady.
Onyń sózine qaraǵanda, 2019 jyly respýblıkalyq bıýdjettiń shyǵystary 1 trln 206 mlrd teńgege ulǵaıa otyryp, naqtylaýdyń nátıjesinde 11 trln 933 mlrd teńgeni quramaq.
Bıýdjetti naqtylaýdyń negizgi baǵyty «Áleýmettik qamqorlyq» jańa áleýmettik sharalardy iske asyrýǵa arnalǵan, olarǵa aǵymdaǵy jyly tıisti is-sharalar boıynsha 481,3 mlrd teńge bólinedi. Osy oraıda 2019 jylǵa arnalǵan 261,3 mlrd teńge shyǵystar azamattardyń jekelegen sanattaryn áleýmettik qoldaýdy kúsheıtýge negizdelgen.
