Senat BUU-nyń Sýbóńirlik bólimshesine qatysty zań jobasyn qabyldady
ASTANA. QazAqparat - Parlament Senaty «QR Úkimeti men BUU arasyndaǵy Soltústik jáne Ortalyq Azııa úshin Sýbóńirlik bólimshege arnalǵan ákimshilik pen qarjylyq rásimderge qatysty kelisimdi ratıfıkatsııalaý týraly» zań jobasyn qabyldady, dep habarlaıdy «QazAqparat» HAA tilshisi.
Parlament Senatynyń búgingi otyrysynda QR Syrtqy ister mınıstri Qaırat Ábdirahmanov zań jobasyn maquldaýdy surady. Mınıstr óz sózinde zań jobasyna Azııa men Tynyq muhıtqa arnalǵan ekonomıkalyq jáne áleýmettik komıssııasynyń Soltústik jáne Ortalyq Azııa úshin Sýbóńirlik bólimshesi Almaty qalasynda ashylǵanyn atap ótti.
«QR Úkimetiniń 2011 jylǵy 4 mamyrdaǵy qaýlysymen BUU arasynda ESKATO-nyń bólimshesin qurý týraly negizgi kelisim maquldandy. Atalǵan kelisimniń 8-shi babyna sáıkes, sýbóńirlik bólimsheniń ákimshilik jáne qarjylyq rásimderine qatysty qosymsha halyqaralyq shart jasaý kózdelgen bolatyn. Ákimshilik jáne qarjylyq kelisimge sáıkes, qazaqstandyq tarap ESKATO-ǵa jyl saıyn 100 myń AQSh dollar qarjy, keńselik úı-jaıdy jáne baǵdarlamalyq iskerlik is-áreket sharalaryn jabýǵa bóledi. Sonymen qatar, keńselik úı-jaı beredi. Osy zańdy qabyldaý respýblıkalyq bıýdjetten kelisimde qarastyrylǵan somadan basqa qosymsha qarajat bólýdi qajet etpeıdi», - dedi Qaırat Ábdirahmanov.
Mınıstr sonymen birge, qarastyrylyp jatqan máseleniń saıası mańyzdylyǵyn atap ótti.
«Kelisimniń ratıfıkatsııasy Qazaqstannyń ESKATO-nyń maqsattary men mindetterine beıimdelýge, Azııa men Tynyq Muhıt óńirlerimen baılanysty nyǵaıtýǵa múmkindik beredi. Sýbóńirlik bólimshe Elbasynyń bastamasyna sáıkes, Almaty qalasyndaǵy kópjaqty dıplomatııa jónindegi halyqaralyq habin qurý tujyrymdamasyna saı kelip otyr. BUU haby halyqaralyq uıymnyń Ortalyq Azııadaǵy uıymdarynyń tıimdiligin arttyrýǵa baǵyttalǵan», - dedi mınıstr.
Qaırat Ábdirahmanovtyń aıtýynsha, BUU-nyń basqa da agentterimen qatar, «EKSPO-2017» murasy retindegi jasyl tehnologııalar men ınvestıtsııalyq jobalar jónindegi halyqaralyq ortalyqty qurý týraly Qazaqstannyń bastamasyn qoldaǵan.
Zań jobasy talqylanǵannan keıin atalǵan kelisimdi Senat Tóraǵasy kelisimdi maquldaýdy daýysqa saldy. Depýtattardyń daýysy boıynsha Senat zań jobasyn maquldady.
