Senat Bolgarııamen sottalǵandardy berýge qatysty qujatty qabyldady

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasy men Bolgarııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Buǵan deıin Qazaqstan men Bolgarııa arasynda adamdardy ustap berý jáne qylmystyq ister boıynsha quqyqtyq kómek týraly sharttarǵa ratıfıkatsııa jasaldy. Endi sońǵy kelisimdi usynyp otyrmyz – ol sottalǵan adamdardy berý týraly. Qylmystyq salada áriptestik osy Shartpen aıaqtalmaq. Kelisim halyqaralyq tájirıbede qalyptasqan úlgi negizde jasalǵan. Shart, el aýmaǵynan tys jerlerde júrgen azamattarymyzdy qorǵaý jáne olarǵa qamqorlyq jasaý týraly kontıtýtsııalyq mindetterdi oryndaýǵa baǵyttalǵan», - dedi QR Bas prokýrorynyń orynbasary Marat Ahmetjanov.

Kelisimniń basty erejesi – sottalǵan adamdardy óz elinde jazasyn óteý úshin berý jáne olarmen almasý tártibin retteý.

«Endi onyń talaptaryna toqtalsaq. Sottalǵan adamdy berý úshin eń aldymen sottalǵan adam eki eldiń biriniń azamaty bolýy tıis, eki elde de qylmys bolyp sanalatyn áreket úshin sottalǵan bolýy kerek, suraý alynǵan kezde úkim zańdy kúshine engen bolýy tıis jáne keminde 6 aı óteıtin ýaqyty qalýy kerek. Sonymen qatar, sottalǵan adamnyń jazbasha kelisimi kerek jáne eki el de berýge kelisýi qajet. Osy aıtylǵan talaptar saqtalmasa, adam berilmeıdi», - dep túsindirdi ol.

Qazir elimizde de, Bolgarııada da sottalǵan azamattar joq. Jalpy eki el arasynda qarym-qatynas jaqsy damyp keledi.

«Bundaı sharttar 21 elmen jasalǵan. Bul qujat adam quqyqtaryna tikeleı qatysty. Sol sebepti «Qazaqstan Respýblıkasynyń halyqaralyq sharttary týraly» Zańǵa saı ratıfıkatsııa jasaýǵa jatady», - dedi M. Ahmetjanov.