Senat bıznesti júrgizý jaǵdaıyn jaqsartatyn zańdy qabyldady
NUR-SULTAN. QazAqparat – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kásipkerlik qyzmet salasynda jańa retteýshilik saıasatty endirý jáne Qazaqstan Respýblıkasy ishki ister organdarynyń jekelegen fýnktsııalaryn qaıta bólý máseleleri boıynsha ózgerister men tolyqtyrýlar engizý týraly» QR Zańy qabyldandy, dep habarlaıdy QazAqparat tilshisi.
«Bul zań Memleket basshysynyń tapsyrmalaryn oryndaý úshin ázirlendi. Qujatta bıznesti qoldaıtyn jańa zańnamalyq sharalar usynyldy. Soǵan sáıkes, bıznesti retteıtin quqyqtyq aktilerdi ázirleý jáne qabyldaý tártibi kásipkerlerdiń zańdy múddelerin eskere otyryp kúsheıtiledi. Bul zań bıznesti damytýǵa qajetti jaǵdaılardy qamtamasyz etýge jáne memlekettik organdar tarapynan kásipkerlerdiń qyzmetine negizsiz aralasýdy boldyrmaýǵa baǵyttalǵan», - dedi Senat Tóraǵasy Máýlen Áshimbaev.
Bıznesti júrgizý úshin ońtaıly jaǵdaı jasaý – Zańnyń basty maqsaty. Mysaly, bızneske qoıylatyn qosymsha talaptardyń paıda bolýyna oraı endi «1 in 2 out» qaǵıdaty boıynsha kúres júretin bolady. Bul degenimiz, bir jańa talap engizilgende nemese bızneske qatysty retteýdi qatańdatqanda, bıznesti quqyqtyq retteýdegi sol saladan basqa eki talap alynyp tastalýy tıis. Sonymen qatar osy Zańǵa sáıkes, endi memlekettik organdardyń laýazymdy tulǵalary bızneske zalal keltirgeni úshin zańdy túrde jekeleı jaýapty.
