Senat bıznesti zańsyz tekseristerden qorǵaýǵa baǵyttalǵan zańdy qabyldady
ASTANA. QazAqparat - QR Parlamenti Senatynda «Prokýratýra týraly» zań jobasy qabyldandy, dep xabarlaıdy QazAqparat.
Zań jobasyn tanystyrǵan QR Bas prokýrorynyń orynbasary Marat Axmetjanov budan bylaı prokýratýra quqyqtyq aktilerge taldaý júrgizip, olarǵa baǵa beretin quqyqqa ıe bolmaq. Osylaısha, aktilerge baǵa berý krıterııi olardyń zań kúshine enýi bolady. Mundaı baqylaý memlekettik organdar men kvazımemlekettik sektordyń shyǵarǵan aktilerine júrgiziledi jáne olarǵa narazylyq engizilýi múmkin. Prokýrorlyq baqylaý bıznesti zańsyz jáne negizsiz tekseristerden qorǵaýǵa baǵyttalmaq. Zań jobasynda prokýratýranyń basqa memlekettik organdardyń quzyryn qaıtalaýyna jol berilmeıdi.
Prokýrorlyq tekseris tek tıisti shaǵymdar tússe ǵana júrgiziledi. Al basqa tekserister úshin tómendegideı negizdemeler bolýy shart: azamat óziniń quqyqtaryn qorǵaı almasa, shektelmegen tulǵa toptarynyń quqyqtary buzylǵanda, adam ómirine jáne densaýlyǵyna, ekonomıkaǵa, memlekettiń qaýipsizdigine qater tóngende, taraptar arasynda daý shyqqanda nemese baqylaýshy jáne qadaǵalaýshy organ sheshimine qarsy shaǵym túskende.
Osynyń arqasynda prokýrorlar maqsatty túrde jumys isteıdi. Tekserister Memleket basshysy men Bas prokýrordyń tapsyrmasymen de júrgiziledi. Bas prokýrordyń orynbasary atap ótkenindeı, tekserister bir aı merzimde júrgiziledi. Keıbir jaǵdaılarda taǵy bir aıǵa sozdyrylýy yqtımal. Endi prokýror zańdy kúshine enbegen sot aktilerine qatysty narazylyq engize almaıdy. Bul sot protsesiniń qatysýshylaryn teń jaǵdaıda qaldyrýǵa sep bolady. Azamattyq protsesterge prokýrorlardyń qatysýy azaıtyldy.
