Senat bıznes-klımatty jaqsartý máseleleri jónindegi zań jobasyn qabyldady
NUR-SULTAN. QazAqparat – Parlament Senatynda «QR-nyń keıbir zańnamalyq aktilerine bıznes-ahýaldy jaqsartý máseleleri boıynsha ózgerister men tolyqtyrýlar engizý týraly» zań jobasy maquldandy, dep habarlaıdy QazAqparat tilshisi.
Zań jobasy boıynsha qorytyndyny oqyǵan Senattyń Ekonomıkalyq saıasat, ınnovatsııalyq damý jáne kásipkerlik komıtetiniń tóraǵasy Serik Jaqsybekov zańnyń maqsaty týraly aıtyp ótti. Onyń aıtýynsha, zań jobasymen Jer, Bıýdjet, Kásipkerlik jáne Azamattyq protsestik kodeksterine, sondaı-aq taǵy birneshe zańǵa ózgerister men tolyqtyrýlar engiziledi.
«Zań jobasynyń mindeti - taýar naryqtaryndaǵy básekelestik ortanyń jaı-kúıin jaqsartý, birqatar kórsetiletin qyzmetterdi elektrondy formatqa kóshirý, memlekettiń kásipkerlik qyzmetke qatysýyn qysqartý, monopolııaǵa qarsy den qoıý sharalarynyń tıimdiligin arttyrý. Zań jobasy tehnıkalyq jaǵynan kúrdeli emes nysandar úshin keshendi saraptamanyń, tehnıkalyq jáne avtorlyq qadaǵalaýdy jaldaý mindettemesiniń kúshin joıýdy, táýekeli tómen qurylys nymandaryn mindetti saraptamadan alyp tastaýdy, menshik ıeleriniń kelisiminsiz úshinshi tulǵalar úshin jyljymaıtyn múlikke aýyrtpalyq týraly aqparatqa jarııa qoljetimdilikti ashýdy kózdeıdi. Sondaı-aq, jyljymaıtyn múlikke satyp alý-satý mámilesine óndiristik tirkeý týraly belgi qoıý mindettiliginiń kúshin joıýdy, azamattyq avıatsııa salasyndaǵy ýákiletti organnyń áýejaıdyń aýmaǵynda áýejaı qyzmetine jatpaıtyn qyzmetterdi kórsetýge qoljetimdilik qaǵıdalaryn bekitýdi qarastyrady», - dedi ol.
Zań jobasyn qabyldaý arqyly «Doing Business» halyqaralyq reıtıngi baǵalaıtyn bıznes-ahýaldy jaqsartý kózdelgen. Sonymen birge taýar naryqtaryndaǵy básekelestik ortanyń jaı-kúıin jaqsartý, jarnama salasyndaǵy jarnamany jetildirý, jekeshe kásipkerlikti memlekettik retteý protsesiniń ashyqtyǵyn arttyrý mindeti de bar.
