Senat birqatar sýdıalardy qyzmetinen bosatty
ASTANA. 26 jeltoqsan. QazAqparat - Búgin QR Parlamenti Senatynyń jalpy otyrysynda palata depýtattary QR Joǵarǵy Sotynyń sýdıalaryn qyzmetinen bosatý jáne saılaý týraly máselelerdi qarady. Eske salsaq, Konstıtýtsııaǵa sáıkes, Joǵarǵy Sot sýdıalaryn qyzmetinen bosatyp, saılaý Senattyń erekshe qyzmetine jatady.
Atap aıtqanda, sýdıa laýazymynda 33 jyl qyzmet atqarǵan Anatolıı Lınnık pen sýdıalyq ótili 17 jyl Raýshan Nurtaı zeınet jasyna baılanysty jumystan bosatý týraly ótinish bergen. Budan bólek, Gúlnár Rysbekovaǵa sýdıa qyzmetinen otstavkaǵa ketý týraly quqyǵy usynylyp, bul QR Prezıdenti Ákimshiligimen kelisilgen.
Sonymen qatar, Joǵarǵy Sot sýdıasy retinde Laýra Aǵybaeva, Elena Aqmoldaeva, Irına Kalashnıkova, Margarıta Odıntsova, Amangeldi Sársenbaev saılandy. Zańǵa sáıkes, jańadan saılanǵan sýdıalar Senat aldynda ant qabyldady.
Senat spıkeri jańa qyzmetke kirisken sýdıalarǵa tabys tilep, eńbekteri jemisti bolatynyna senim bildirdi.
