Senat bıootyn óndirisi men aınalymyn retteýge baılanysty eki zań jobasyn Májiliske qaıtardy
ASTANA. Mamyrdyń 6-sy. QazAqparat /Qanat Mámetqazyuly/ ‑ Búgin QR Parlamenti Senatynyń jalpy otyrysynda palata depýtattary «Bıootyn óndirisi jáne aınalymyn memlekettik retteý týraly» zań jobasyn ekinshi oqylymda talqylap, qujatqa túzetýler engizilgendikten Májiliske qaıtardy,
dep habarlaıdy QazAqparat.
Esterińizge sala keteıik, zań jobasynyń negizgi maqsaty bıootyn óndirisin jáne aınalymyn damytý, bıotyn óndirisi kezinde memlekettiń azyq-túlik qaýipsizdigin qamtamasyz etý máselelerin retteý, sondaı-aq qorshaǵan ortany qorǵaý bolyp tabylady. Qujatty qabyldaý bıootyn óndirisi jáne aınalymy kezinde týyndaıtyn qoǵamdyq qatynastardy retteýdi qamtamasyz etýge jáne quqyqtyq, ekonomıkalyq, uıymdastyrý jaǵdaılaryn aıqyndaýǵa múmkindik beredi. Aıta ketý kerek, qujatty qabyldaý teris áleýmettik jáne ekonomıkalyq saldarǵa ákep soqpaıdy, otyn resýrstarynyń ekologııalyq taza kózderin utymdy paıdalaný úshin qajetti quqyqtyq, ekonomıkalyq, uıymdastyrýshylyq jaǵdaılar jasaýǵa múmkindik beredi. Onyń ústine ekologııalyq qaýipsiz tehnologııalardy engizý, energııanyń tıimdiligi jáne energııa únemdeý, emıssııalardy, onyń ishinde parnıktik gazdar men ozon qabatyn buzatyn zattardy azaıtý Qazaqstan Respýblıkasynyń 2024 jylǵa deıingi turaqty damýǵa kóshý basymdyqtary bolyp tabylady.
Qujatty ekinshi oqylymǵa ázirleý barysynda senatorlar zań jobasyna birqatar túzetýler jasady. Atap aıtqanda, joǵary palata depýtattary «bıootyn aınalymy» uǵymyn engizdi ári jobanyń tujyrymdamasyna qatysty ózgerister de oryn aldy. Budan bólek túzetýlerdiń bir parasy redaktsııalyq jáne naqtylaý sıpatynda bolyp otyr.
Sondaı-aq, jıyn barysynda palata depýtattary atalǵan qujatpen baılanysty «QR keıbir zańnamalyq aktilerine bıootyn óndirisin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» ilespe zań jobasyn da ekinshi oqylymda talqylap, qos birdeı qujatty Májiliske qaıtardy.
