Senat bıologııalyq zertteýdegi halyqaralyq yntymaqtastyqqa qatysty zańdy maquldady
ASTANA. KAZINFORM – Búgin Senattyń jalpy otyrysynda «Bıologııalyq materıal almasý týraly kelisimdi ratıfıkatsııalaý týraly» Zańy maquldandy.
Bul k elisimge 2022 jylǵy 20 mamyrda Mınsk qalasynda qol qoıylǵan.
«Osy zań - bıologııalyq zertteýler salasyndaǵy halyqaralyq yntymaqtastyqty nyǵaıtý jolyndaǵy mańyzdy qadam. Sondaı-aq, TMD-ǵa múshe memleketterdiń janýarlardyń juqpaly aýrýlarynyń taralýyn boldyrmaý, asa qaýipti aýrýlardyń zerthanalyq dıagnostıkasyn jetildirý, mıkroorganızmderdiń ulttyq kollektsııalaryn tolyqtyrý jáne osy kelisimge qol qoıǵan memleketterdiń aýmaqtaryn epızootııadan qorǵaý jónindegi kúsh-jigerin biriktirýge múmkindik beredi. Kelisimdi ratıfıkatsııalaý bıologııalyq materıaldarmen almasýdy halyqaralyq standarttar men talaptarǵa sáıkes retteı otyryp, ǵylymı mekemelerdiń sheteldik áriptestermen ózara is-qımyly úshin quqyqtyq bazany qamtamasyz etedi», - dedi senator Sáken Arýbaev.
Onyń aıtýynsha, bul kelisim Qazaqstan zańnamasyna, ratıfıkatsııalaǵan halyqaralyq sharttarǵa halyqaralyq uıymdardyń sheshimderine sáıkes keledi. Jahandyq bıologııalyq materıal almasý jelisine qosylý elimizdiń ulttyq zertteý mekemelerine biregeı úlgilerge qol jetkizýge jáne jetekshi álemdik zerthanalarmen birlesken zertteýler júrgizýge múmkindik beredi. Ǵylymı ázirlemelerdiń sapasyn jáne halyqaralyq arenadaǵy ulttyq ǵylymı ınstıtýttardyń bedelin arttyrady.
«Bıomaterıaldy alýshy tıisti qorǵaý júıesi bar óz zerthanasynda dıagnostıkalyq, monıtorıngtik jumystar jáne ǵylymı-zertteý jumystaryn júrgizý maqsatynda ǵana paıdalanady. Bıomaterıal kommertsııalyq lıtsenzııa ónimderin nemese kórsetiletin qyzmetterdi óndirý nemese satý sııaqty kommertsııalyq maqsattarda paıdalanylmaıdy. Kez kelgen zertteýler aıaqtalǵan soń, alýshy tarap zertteýlerdi júrgizý nátıjeleri týraly ónim berýshi jaqty habardar etýge mindetteledi», - dedi depýtat.
Onyń paıymynsha, osy bıologııalyq materıal almasý týraly kelisimdi ratıfıkatsııalaý medıtsına men ǵylymdaǵy progreske yqpal etetin bıomaterıaldardy tıimdirek jáne qaýipsiz almasýǵa quqyqtyq negiz jasaıdy.
«Kelisim ulttyq múddelerge sáıkes keledi jáne qoldanystaǵy zańnamaǵa qaıshy kelmeıdi», - dedi senator.
