Senat bilikti zań kómegin qamtamasyz etýge baǵyttalǵan jobany Májiliske qaıtardy
ASTANA. Qazannyń 22-ci. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine bilikti zań kómegin qamtamasyz etý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylap, qujatty Májiliske qaıtardy,
dep habarlaıdy QazAqparat.
Atalǵan zań jobasymen Qylmystyq is júrgizý kodeksine, Qylmystyq atqarý, Azamattyq is júrgizý kodeksterine, Ákimshilik is júrgizý týraly kodekske, sondaı-aq «Advokattyq qyzmet týraly» zańǵa jáne basqa da zańdarǵa ózgerister men túzetýler engiziledi. Jobany qabyldaýdyń basty maqsaty elimizdegi árbir azamattyń bilikti zań kómegin alý quqyǵy týraly, sondaı-aq zań kómegin tegin kórsetý týraly konstıtýtsııalyq erejelerdi iske asyrý bolyp tabylady. Budan basqa, qujatta seziktiniń, aıyptalýshynyń, sottalǵannyń jáne jábirlenýshiniń quqyqtaryn qamtamasyz etýdiń tetikterin keńeıtý, advokattyń rólin arttyrý, sot úderisi barysynda taraptardyń jaryspalylyǵy men teń quqylyǵy qaǵıdattaryn iske asyrý sharalary kózdelip otyr. Sonymen birge, qujatta Qylmystyq kodekstiń 365-babynyń jańa redaktsııasy usynylady. Oǵan sáıkes, advokattar men ózge de adamdardyń, azamattardyń quqyqtaryn, bostandyqtary men zańdy múddelerin qorǵaý jónindegi zańdy qyzmetine tulǵanyń óz qyzmet babyn paıdalana otyryp kedergi jasaǵany úshin qylmystyq jaýapkershilik kózdeledi.Jobadaǵa normalar boıynsha jábirlenýshige asa aýyr qylmys jasaý arqyly keltirilgen múliktik zııan úshin aqshalaı ótemaqyny memleket esebinen tóleý de qarastyrylyp otyr. Budan basqa advokattyń qadaǵalaý satysyndaǵy sot otyrysyna mindetti túrde qatysýy jáne osy satyda qorǵaýshyny shaqyrýǵa, taǵaıyndaýǵa, aýystyrýǵa, onyń eńbegine aqy tóleýge baılanysty máselelerdi sheshý tártibi belgilenedi.
Jobany talqylaý barysynda senatorlar birqatar túzetýler engizdi. Atap aıtqanda, Qylmystyq is júrgizý kodeksiniń birqatar baptary kúdiktiniń, aıyptalýshynyń, qorǵaýshynyń jáne jábirlenýshiniń ózine qatysty qaýipsizdik sharalaryn qoldaný týraly ótinishin málimdeý quqyǵy týraly normamen tolyqty. Birshama naqtylaý sıpatynda ózgerister jasaldy.
