Senat baj somasyn bólýdiń jańa normatıvterin bekitetin EAEO hattamasyn maquldady

NUR-SULTAN. QazAqparat – Senatorlar 2014 jylǵy 29 mamyrdaǵy EEO týraly shartqa ózgerister engizý, jekelegen halyqaralyq sharttardyń qoldanysyn ózgertý jáne toqtatý týraly hattamany ratıfıkatsııalaý týraly zań jobasyn maquldady, dep habarlaıdy QazAqparat tilshisi.

Zań jobasy buǵan deıin Parlament Májilisinde maquldanǵan bolatyn.

«Hattama 2019 jyly 1 qazanda Erevanda jasaldy. Hattamada kedendik ákelý bajdarynyń somalaryn bólýdiń jańa normatıvterin bekitý kózdeledi. Normatıvterdiń mólsheri múshe bes memleket úshin aıqyndalǵan. Bul rette Qazaqstan úshin normatıv 6,955% bolyp tabylady. Atalǵan normatıvter Eýrazııalyq ekonomıkalyq odaqqa múshe memleketter arasynda kedendik ákelý bajdaryn bólýge mólsherles tásildi qamtamasyz etýge arnalǵan», - dedi zań jobasyn senatorlarǵa tanystyrǵan Ulttyq ekonomıka mınıstri Rýslan Dálenov.

Sondaı-aq, Hattamada múshe memleketterdiń joǵary memlekettik qarjylyq baqylaý organdary birlesken baqylaý is-sharalary sheńberinde múshe memleketterdiń ýákiletti organdarynyń osy Hattamanyń erejelerin saqtaýyn jyl saıyn tekseretini aıqyndalǵan.

««Halyqaralyq sharttar týraly» zańǵa sáıkes osy Hattama ratıfıkatsııalaýǵa jatady. Zań jobasyn qabyldaý áleýmettik-ekonomıkalyq jáne quqyqtyq teris saldarǵa ákep soqtyrmaıdy», - dedi ol.

Zań jobasy birshama talqylanyp, depýtattardyń bergen daýysynan keıin qujat qabyldandy.