Senat «Báıterek» ǵarysh kesheniniń jumysyna qatysty qujatty maquldady
ASTANA. KAZINFORM – Búgin Senattyń jalpy otyrysynda «2004 jylǵy 22 jeltoqsandaǵy Qazaqstan Úkimeti men Reseı Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister engizý týraly hattamany ratıfıkatsııalaý týraly» Zańy maquldandy.
Atalǵan hattama memlekettik jobany iske asyrý merzimderin naqtylap, birqatar salyq jáne uıymdastyrý máselelerin retteýge baǵyttalǵan.
- Hattamada mynadaı negizgi ózgerister kózdelgen: ushý synaqtarynyń bastalý merzimi 2023 jyldan 2025 jylǵa aýystyrylady. 2028–2039 jyldar aralyǵynda jylyna eki ret emes, úsh ret kepildendirilgen ushyrýdy júrgizý josparlanǵan. «Báıterek» aktsıonerlik qoǵamyna korporatıvtik tabys salyǵy boıynsha jeńildikter merzimi 2028 jyldan, ıaǵnı jańa keshen paıdalanýǵa berilgennen keıin 15 jylǵa deıin uzartylyp otyr. Atalǵan salyq boıynsha preferentsııalar jobanyń tehnıkalyq-ekonomıkalyq negizdemesinde qarastyrylmaǵanymen, bıýdjetke qosymsha júkteme túsirmeı, ınvestıtsııalyq tartymdylyqty arttyrý maqsatynda usynyldy. Qarjylandyrý respýblıkalyq bıýdjetten memlekettik tapsyrma aıasynda júzege asyrylady. Qazirgi ýaqytta Qazaqstan óz mindettemelerin tolyq kólemde oryndap otyr. Tehnıkalyq jáne ushyrý keshenderi jańartylyp jatyr, - dedi senator Bıbigúl Jeksenbaı.
Onyń aıtýynsha, jobany jalpy quny – 90,8 mlrd teńge, onyń ishinde 2025 jylǵa 60,8 mlrd teńgesi kózdelgen. Reseı tarapy «Soıýz-5» zymyran tasyǵyshyn jáne onyń tehnıkalyq jabdyqtaryn daıyndaý jumystaryn júrgizip jatyr. Zaýyttyq synaqtar qazaqstandyq mamandardyń qatysýymen júzege asyryldy. Alǵashqy ushyrý 2025 jylǵy jeltoqsan aıyna josparlanǵan.
- «Soıýz-5» zymyran tasyǵyshynyń artyqshylyqtaryna toqtalsaq, ekologııalyq turǵydan qaýipsiz, kerosın men ottegi otynyn qoldanady. «Soıýz-5» qazirgi kezde paıdalanyp júrgen «Proton-M»-nyń ornyn basady. «Báıterek» jobasy - Qazaqstan táýelsizdik alǵannan bergi Baıqońyrdaǵy alǵashqy jáne jalǵyz tolyqqandy birlesken bastama. Bul joba ǵarysh aılaǵy ınfraqurylymyn saqtap qalý, otandyq kadrlyq áleýetti arttyrýǵa, ǵarysh salasynyń tolyq tsıklyn, apparattar jasaý men olardy ushyrýdy ózimizde uıymdastyrýǵa múmkindik beredi, - dedi depýtat.
Onyń sózine qaraǵanda, qazir elimizde bes ǵarysh apparaty paıdalanylýda. Taǵy bes apparat jasalyp jatyr. Onyń ekeýi eksporttyq kelisimder aıasynda shetelge arnalǵan. Bul otandyq óndiristi damytýdyń jáne kommertsııalyq ǵarysh salasyn qalyptastyrýdyń naqty kórsetkishi. «Báıterek» keshenin ýaqytyly iske qosý Qazaqstan úshin ǵarysh apparattaryn qurastyrý men ushyrýdy qamtıtyn tıimdi kommertsııalyq júıe qurýǵa jol ashady.
Eske salsaq, «Báıterek» BK» AQ-nyń Basqarma tóraǵasy Aıdyn Aıymbetov «Báıterek» kesheninen «Soıýz-5» zymyran-tasyǵyshynyń alǵashqy ushyrylymy jyl sońyna josparlanǵanyn rastady.