Senat «Baıqońyr» keshenin jalǵa berý shartyna ózgeris engizý týraly hattamany qabyldady

Talqylaý barysynda Senattyń Halyqaralyq qatynastar, qorǵanys jáne qaýipsizdik komıtetiniń depýtattary «sharttyń Qazaqstan egemendigine nuqsan keltiretinin» alǵa tartyp, qabyldamaýdy usynǵanymen, daýys berý barysynda basqasha sheshim jasaldy.

Esterińizge sala keteıik, zań jobasy «Baıqońyr» kesheni aýmaǵynda turatyn Qazaqstan Respýblıkasy azamattarynyń konstıtýtsııalyq quqyqtary men bostandyqtarynyń saqtalýyna baǵyttalǵan. Al jańa Hattamaǵa qol qoıý QR Konstıtýtsııalyq Keńesiniń 2001 jylǵy 7 mamyrdaǵy qaýlysymen «Baıqońyr» keshenin jalǵa berý shartynyń 6 baby, 6.12 tarmaǵynyń ekinshi bóliginiń normalaryn RF quqyq qorǵaý organdary men sottarynyń «Baıqońyr» kesheni aýmaǵynda turatyn Qazaqstan azamattaryna qatysty zańdy quzyry bóliginde QR Konstıtýtsııasyna sáıkes kelmeıdi dep tanýyna baılanysty týyndaǵan bolatyn. Osyǵan oraı, atalǵan normany boldyrtpaý maqsatynda sharttyń 6 baby 6.12 tarmaqtarynyń ekinshi jáne úshinshi azatjoldary ózgertilgen. Buǵan sáıkes, «Baıqońyr» kesheninde jumys isteıtin ǵarysh aılaǵy personalynyń, RF quqyq qorǵaý organdary men memlekettik bılik organdary qyzmetkerleriniń ishinen RF azamattarynyń ǵana, sondaı-aq atalǵan azamattardyń otbasy músheleri bolyp tabylatyn RF basqa da azamattaryna qatysty, olar RF men onyń azamattaryna qarsy quqyqqa qaıshy is-qımyl jasaǵan jaǵdaıda «Baıqońyr» kesheni aýmaǵynda jáne odan tys jerlerde RF zańdy quzyry qoldanylady. Basqa jaǵdaılarda Qazaqstannyń zańdy quzyry qoldanylady. Osylaısha, Hattama RF quqyq qorǵaý organdarynyń Qazaqstan azamattaryn qylmystyq qýdalaýyn boldyrmaý maqsatynda «Baıqońyr» keshenin jalǵa berý shartyna naqtylaý engizilgen. Alaıda, Halyqaralyq qatynastar, qorǵanys jáne qaýipsizdik komıtetiniń depýtattary Hattamada jasalǵan tujyrymdar Konstıtýtsııalyq Keńestiń qorytyndysyna birqatar negizder boıynsha tolyǵymen sáıkes kelmeıdi degen sheshimge kelgen. «Ata zańymyzǵa sáıkes, Respýblıkanyń egemendigi onyń búkil aýmaǵyn qamtıdy. Al «Baıqońyr» kesheni Qazaqstan aýmaǵynyń ajyramas bóligi bolyp tabylady. Sondyqtan Qazaqstan aýmaǵyna RF zańdy quzyrynyń qoldanylýy onyń egemendigine nuqsan keltiredi. Ekinshiden, sheteldik quqyq normalary Qazaqstannyń qoldanystaǵy zańnamasynyń júıesine kirmeıdi jáne onyń aýmaǵyndaǵy buqaralyq-quqyqtyq qatynastarda bul normalardyń qoldanylýy memlekettiń egemendigine nuqsan keltirýge ákep soǵady. Sondaı-aq Hattamanyń RF zańdy quzyry «Baıqońyr» kesheninen tys jerlerde, Qazaqstannyń búkil aýmaǵynda qoldanyla alady degen normalary da quqyqqa qaıshy kelip tur», - dedi depýtat Baýyrjan Muhamedjanov.

Alaıda, zań jobasy boıynsha Bas komıtet bundaı dálelderdiń negizsizdigin alǵa tartady. «Birinshiden, buǵan deıin Konstıtýtsııalyq Keńestiń sheshimimen shart RF quqyq qorǵaý organdary men sottarynyń Respýblıkamyzdyń aýmaǵynda Qazaqstan azamattaryna qatysty zańdy quzyry bóliginde ǵana Konstıtýtsııaǵa sáıkes kelmeıdi dep tanylǵan. Ekinshiden, jańa erejege sáıkes, RF azamattary bolyp tabylatyn «Baıqońyr» kesheninde jumys isteıtin ǵarysh aılaǵy personalynyń, RF quqyq qorǵaý organdary men memlekettik bılik qyzmetkerleri qataryndaǵy adamdardyń jáne olardyń otbasy músheleriniń Reseı Federatsııasyna jáne onyń azamattaryna qarsy quqyqqa qaıshy is-qımyl jasaǵany úshin RF zańdy quzyryn qoldanýǵa jol beriledi. Budan bólek, áskerı qyzmet mindetterin atqarýǵa baılanysty jasalǵan áskerı qylmystar men quqyq buzýshylyqtar jasalǵan jaǵdaıda «Baıqońyr» kesheninen tys jerlerde Reseıdiń zańdy quzyryn tek Reseı azamattaryna ǵana qatysty qoldanýǵa jol beriledi. ıAǵnı, RF zańdy quzyry tek Reseı azamattaryna ǵana qoldanylatyny baıqalady. Sondyqtan Qazaqstannyń egemendigine nuqsan keltirilýi týraly aıtýǵa negiz joq», - dedi Zańnama jáne quqyqtyq máseleler komıtetiniń tóraǵasy Berik Imashev.

Daýys berý barysynda atalǵan zańdy 30 senator jaqtap, 7-eýi qarsy boldy.