Senat bank qyzmeti týraly qujatty Májiliske qaıtardy

ASTANA. KAZINFORM — Búgin Senattyń jalpy otyrysynda «Qazaqstan Respýblıkasyndaǵy bankter jáne bank qyzmeti týraly» Zańy qaraldy. Senatorlar qujattyń jekelegen baptaryn jańa redaktsııada usynyp, ony Májiliske qaıtardy. 

Zańnyń maqsaty — bank qyzmetin retteý men qadaǵalaýdy jetildirý arqyly bank júıesiniń turaqtylyǵyn jáne ornyqtylyǵyn qamtamasyz etý, sondaı-aq bank qyzmetterin kórsetýge qolaıly jaǵdaılar jasaý men olardyń sapasyn arttyrý úshin qarjy naryǵynda adal básekelestik pen ınnovatsııalardy yntalandyrý.

Bank sektorynda básekelestikti yntalandyrý maqsatynda ruqsat etilgen operatsııalardyń kólemi men retteýshi talaptardyń deńgeıi boıynsha erekshelenetin lıtsenzııalardyń bazalyq jáne ámbebap túrlerin engizý eskerilgen. Aktıvter boıynsha belgilengen lımıtke qol jetkizgen kezde bazalyq lıtsenzııasy bar bank banktik operatsııalardyń barlyq spektrin júzege asyrýǵa múmkindik beretin ámbebap lıtsenzııaǵa kóshýge mindetti bolady.

— Islamdyq qarjylandyrýdy damytýdy yntalandyrý maqsatynda dástúrli bankterge qoldanystaǵy lıtsenzııa aıasynda ıslamdyq bank operatsııalaryn júzege asyrýǵa jáne ıslamdyq bank operatsııalaryn júzege asyrýǵa qosymsha lıtsenzııa alýǵa ruqsat etiledi. Bul tásil bankterge sharıǵat qaǵıdattaryn saqtaýdy qamtamasyz ete otyryp, jeke zańdy tulǵa qurý qajettiginsiz ıslamdyq qarjylyq kórsetiletin qyzmetterdi usynýǵa múmkindik beredi. Sondaı-aq ıslamdyq qyzmetti bankterdiń ózge qyzmetinen uıymdyq jáne eseptik oqshaýlaý mindetti shart bolady, — delingen Senattyń Qarjy jáne bıýdjet komıtetiniń málimetinde.

Senator Sultanbek Mákejanovtyń aıtýynsha, zańda tsıfrlyq qarjy aktıvteri men tsıfrlyq teńgeni quqyqtyq turǵydan retteý de eskerilgen. Memleket tsıfrlandyrý úderisinen shet qalmaı, ulttyq múddelerdi qorǵaı otyryp, osy salany zańdy, baqylanatyn jáne ashyq arnaǵa baǵyttap otyr.

— Jalpy alǵanda, qaralyp otyrǵan qujat qarjy júıesiniń turaqtylyǵyn kúsheıtýge, ekonomıkanyń naqty sektoryn qoldaýǵa, azamattardyń múddesin qorǵaýǵa jáne memlekettiń jaýapkershiligin teńgerimdi túrde júzege asyrýǵa baǵyttalǵan, — dedi depýtat.

Atap aıtqanda, qujatty talqylaý barysynda Senattyń Qarjy jáne bıýdjet komıtetiniń eskertýleri men usynystaryn eskere otyryp, Májilis qabyldaǵan Zańǵa mynadaı negizgi baǵyttar boıynsha ózgerister men tolyqtyrýlar engizý qajettigi týyndady:

— bazalyq banktik lıtsenzııasy bar bankti ámbebap banktik lıtsenzııasy bar bankke kóshirý (qaıta resimdeý) kezinde prýdentsıaldyq normatıvter men lımıtterdi saqtaý jónindegi talaptardy naqtylaý;

— jeke jáne zańdy tulǵalardyń tólemder men aqsha aýdarymdary boıynsha nusqaýlaryn oryndaý bóliginde qor bırjalary men klırıngtik uıymdardyń quqyqtylyǵyn naqtylaý;

— Qazaqstan Respýblıkasynyń beırezıdent-ıslam banki fılıalynyń belgili bir ınvestıtsııalyq qyzmetti júzege asyrý quqyǵyn belgileý;

— banktiń dırektorlar keńesiniń múshesi-táýelsiz dırektory sanalatyn nemese bolýǵa nıettenetin adamdarǵa qoıylatyn talaptardy naqtylaý;

— memlekettik qazynashylyq jáne memlekettik qazynashylyq organdaryna bank qupııasy jónindegi talaptardy taratý;

— múlikke bılik etýge ýaqytsha shekteý qoıýǵa, mámileler jasaýǵa jáne múlikpen ózge de operatsııalar jasaýǵa shekteýler qoıýǵa, bank shottaryndaǵy jeke nemese zańdy tulǵanyń aqshasyna jáne basqa da múlkine tyıym salýǵa jol berilmeıtin qosymsha jaǵdaılardy belgileý;

— derekter sóresin, ol qamtýy tıis aqparat tizbesin engizý maqsattaryn reglamentteý, sondaı-aq derbes derekterdi qorǵaýǵa jáne bank qupııasyn saqtaýǵa mindetti tulǵalar qataryn keńeıtý. Derekter sóresi týraly normalardy qoldanysqa engizý merzimin 2026 jylǵy 1 maýsymnan 2027 jylǵy 1 qańtarǵa aýystyrý;

— tólemge qabiletsiz júıelik mańyzy bar bankti retteýge arnalǵan qarajat kózin naqtylaý.

Eske salsaq, bıyl 26 qarashada Parlament Májilisi «Qazaqstan Respýblıkasyndaǵy bankter jáne bank qyzmeti týraly» zańy men oǵan ilespe qujatty qabyldaǵanyn jazǵan edik. 

Buǵan deıin ámbebap bankterge ıslamdyq bank operatsııalaryn júzege asyrý quqyǵy beriletini málim boldy.