Senat balanyń quqyqtaryn qorǵaýdy qamtamasyz etýge baǵyttalǵan zań jobasyn birinshi oqylymda maquldady
ASTANA. Qyrkúıektiń 30-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaýdy qamtamasyz etý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Esterińizge sala keteıik, atalǵan zań jobasynyń maqsaty balalardy áleýmettik ortanyń teris yqpalynan qorǵaý tıimdiligin arttyrý bolyp tabylady. Bul rette quqyq qoldaný praktıkasynyń basymdyqtaryn jazalaý-qýǵyndaý sharalarynan profılaktıkalyq jáne qorǵaý fýnktsııalaryna qaarı ózgertý sharalary qamtylady. Atap aıtqanda, qujatta balanyń quqyqtaryn qorǵaý men kámeletke tolmaǵandar arasynda quqyq buzýshylyqtardyń aldyn alýǵa baǵyttalǵan quqyqtyq sharalar júıesin keńeıtý kózdeledi. «Osyǵan oraı, zań jobasynda urlyq, tonaý jáne bopsalaýshylyq jasaǵany úshin qylmystyq jaýapkershilik bastalatyn jasty 14-ten 16-ǵa deıin ulǵaıtý kózdeledi. Kámelettik jasqa tolmaǵan balany jezókshelikpen aınalysýǵa tartqany úshin jaýaptylyq kózdelgen bap engiziledi. Budan bólek kámeletke tolmaǵan balanyń erotıkalyq sıpattaǵy materıaldardy satýyna tıym salynady», dedi zań jobasy boıynsha baıandaǵan Іshki ister vıtse-mınıstri Aleksandr Kýlınıch.
Onyń sózine qaraǵanda, qujatta sondaı-aq kámeletke tolmaǵandardy olardyń densaýlyǵyna zııan tıgizetin aýyr jumystarǵa nemese olardyń bilim alýyna kedergi keltiretin jumystarǵa tartýǵa tıym salynady. Zań jobasy boıynsha damyǵan elderdiń balalar quqy boıynsha tájirıbeleri zerdelenip, eskerilgen.
