Senat bala kútimi boıynsha tólem merzimin uzartýǵa qatysty zańdy qabyldady

ASTANA. QazAqparat – Elimizde bala kútimi boıynsha járdemaqy tóleý merzimi 1,5 jasqa deıin uzartyldy. Bul norma búgin Senat qabyldaǵan zańda qamtylǵan, dep habarlaıdy QazAqparat tilshisi.

Atalǵan qujat Qazaqstan Respýblıkasynyń memlekettik jastar saıasaty jáne áleýmettik qamsyzdandyrý salasyndaǵy zańnamany jetildirýge baǵyttalǵan. Zań aıasynda 1 kodeks pen 13 zańǵa ózgerister men tolyqtyrýlar engizý eskerilgen.

Senattyń Áleýmettik-mádenı damý jáne ǵylym komıtetiniń málimetine qaraǵanda, qujatty «jastardy damytý ındeksi», «jastardyń áleýmettik qyzmetteri», «ýaqytsha ornalastyrylmaǵan jastar», «jastarmen jumys jónindegi maman», «jastardyń eńbek jasaqtary» uǵymdary zańnamalyq bekitý qarastyrylǵan.

Sonymen qatar bala kútimi boıynsha járdemaqy tóleý merzimin 1,5 jasqa deıin ulǵaıtý, bazalyq zeınetaqy mólsherin kezeń-kezeńimen kóterý, ortaq zeınetaqy mólsherin esepteý kezinde tabystyń eń joǵary shektelýin 46-AEK-ten 55 AEK-ke deıin arttyrý, saqtandyrylǵan adamdar úshin jumysynan aıyrylý boıynsha áleýmettik tólemderdiń mólsherin ortasha aılyq tabystyń 45%-na deıin ósirý turǵysynda tujyrymdamalyq túzetýler qamtylǵan.

Aıta keteıik, Memleket basshysy Qasym-Jomart Toqaev 2023 jyldan bastap bala kútimine qatysty tólem merzimin 1,5 jasqa deıin uzartýdy tapsyrdy.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik jastar saıasaty jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasy eki oqylymda qaralyp, qabyldandy.

Qujat aıasynda «jastar» uǵymynyń jas shegin 29-dan 35 jasqa deıin ulǵaıtý jóninde túzetý engizildi.

Munymen qosa, áıelderdiń zeınetke shyǵý jasy 2028 jylǵa deıin 61 jas dep bekitildi.