Senat bal ara sharýashylyǵyn damytýǵa arnalǵan qujatty maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy jáne bal ara sharýashylyǵy máseleleri boıynsha ózgerister men tolyqtyrýlar engizý týraly» Zań maquldandy.
- Atalǵan zańmen Qazaqstan Respýblıkasynyń «Asyl tuqymdy mal sharýashylyǵy týraly», «Selektsııalyq jetistikterdi qorǵaý týraly» jáne «Ara sharýashylyǵy týraly» zańdaryna ózgerister men tolyqtyrýlar engizildi. Zańdy ázirleýge ara sharýashylyǵy salasynda jınaqtalǵan birqatar júıeli másele negiz boldy. Búginde bul baǵyttaǵy selektsııalyq jáne asyl tuqymdyq jumystar jetkilikti deńgeıde damymaǵan. Importqa táýeldilik saqtalyp otyr. Sonymen qatar, karantındik baqylaýdyń jetkiliksizdigi ara aýrýlarynyń taralý qaýpin kúsheıtýde. Atalǵan faktorlar salanyń turaqty damýyna keri áserin tıgizip otyr. Osy oraıda, qaralyp otyrǵan zańnyń maqsaty – ara sharýashylyǵy men asyl tuqymdy mal sharýashylyǵy salalaryndaǵy zańnamany jetildirý, ara sharýashylyǵy sýbektileriniń qyzmetin retteý, aralardy qorǵaý, utymdy paıdalaný jáne ósimin kóbeıtý, sondaı-aq salanyń ónimdiligin arttyrýǵa jaǵdaı jasaý, - dedi senator Janbolat Jórgenbaev.
Zańnyń negizgi novellalaryna toqtalsaq, eń aldymen termınologııalyq baza jetildirildi. Atap aıtqanda, «asyl tuqymdy analyq bal ara», «atalyq bal ara», «bal», «aspaptyq uryqtandyrý pýnkti» jáne ózge de jańa uǵymdar engizildi. Bul quqyqtyq retteýdiń birkelkiligin jáne qoldanylatyn normalardyń dáldigin qamtamasyz etýge múmkindik beredi.
Sondaı-aq, aralardy qorǵaý, ósimin kóbeıtý jáne paıdalaný salasyndaǵy ǵylymı-zertteý men jobalaý-izdestirý jumystaryn uıymdastyrý boıynsha jergilikti atqarýshy organdardyń quzyreti keńeıtiledi.
- Negizgi jańashyldyq – «omartanyń veterınarııalyq pasporty» uǵymy engiziledi. Ol omartalardy esepke alý jáne veterınarııalyq-profılaktıkalyq is-sharalardy júrgizý úshin mindetti qujat bolady. Sonymen qatar, zańǵa selektsııalyq jáne asyl tuqymdyq jumystardyń jaı-kúıine memlekettik baqylaýdy kúsheıtýge baǵyttalǵan normalar engizilgen. Qazirgi ýaqytta memlekettik baqylaý negizinen bıýdjettik sýbsıdııalar alatyn sýbektilerdi esepke alý men eseptilikti júrgizý bóliginde júzege asyrylady, - dedi depýtat.
Al asyl tuqymdy mal sharýashylyǵy salasyndaǵy memlekettik ınspektorlarǵa selektsııalyq jáne asyl tuqymdyq jumystardyń jaı-kúıine, sondaı-aq asyl tuqymdy maldyń ónimdiligin baǵalaý men ındekstik baǵalaý qyzmetteriniń sapasyna baqylaý júrgizý ókilettikteri beriledi.
Munymen qosa, bal ara sharýashylyǵy salasynda el aýmaǵynda barlyq tuqymdar boıynsha biryńǵaı Respýblıkalyq palata qurý kózdeledi. Atalǵan norma salany ortalyqtandyrý jáne úılestirýdi qamtamasyz etýge baǵyttalǵan.
Buǵan deıin bal ara sharýashylyǵynda «omartanyń veterınarııalyq pasporty» engiziletinin jazǵan edik.
