Senat bakterıologııalyq quraldarǵa qatysty Zańdy qabyldady
NUR-SULTAN. QazAqparat – Parlament Senatynyń jalpy otyrysynda «Tunshyqtyratyn, ýly nemese basqa da uqsas gazdar men bakterıologııalyq quraldardy soǵysta qoldanýǵa tyıym salý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.
Elbasy Nursultan Nazarbaev jappaı qyryp-joıý qarýyn paıdalanbaý, barlyq bıologııalyq zertteýlerdi tek beıbit maqsatta paıdalaný, halyqaralyq qaýipsizdikti nyǵaıtý boıynsha óz ustanymyn álemdik deńgeıde kóterip, naqty istermen dáleldedi. Qazaqstan bakterıologııalyq jáne ýytty qarýdy ázirleýge, óndirýge ári olardyń qoryn jınaqtaýǵa tyıym salý jáne olardy joıý týraly konventsııany buryn ratıfıkatsııalaǵan. Ýákiletti organ retinde 2007 jyly Bilim jáne ǵylym mınıstrligi bolǵan edi.
«Osy qabyldanǵan konventsııany tolyqtyratyn jáne nyǵaıtýshy elementter retinde sanalatyn Jeneva hattamasy bolyp otyr. Bul eki halyqaralyq qujat bir-birimen óte tyǵyz baılanysty. Usynylyp otyrǵan Jeneva hattamasy halyqaralyq qaýipsizdik júıesinde mańyzdy ról atqarady ári osy saladaǵy qajetti tetikterdiń biri bolyp sanalady. Atalmysh hattama 20 ǵasyrdyń basynda qabyldansa da, búginge deıin ol osy hımııalyq tunshyqtyratyn, ýly bakterıologııalyq quraldardy qoldanýǵa tyıym salatyn basty zańdy qujattyń biri bolyp tanyldy. Sondyqtan mınıstrlik Jeneva hattamasyn ratıfıkatsııalaý máselesin nazarǵa usynyp otyr. Qazirgi kezde 1925 jylǵy Jeneva hattamasyna qatysýshy memleketter sany 140-tan asyp ketti», - dedi Bilim jáne ǵylym mınıstri Ashat Aımaǵambetov.
Sonymen qatar ol qujatqa qatysty ǵylymı-quqyqtyq saraptama joǵary oqý ornynda júrgizilgenin aıtty.
«Qujattyń ǵylymı-quqyqtyq saraptamasyn ál-Farabı atyndaǵy Qazaq ulttyq ýnıversıteti júrgizdi. Osy saraptamaǵa sáıkes, Jeneva hattamasy Qazaqstannyń syrtqy saıasatynyń tujyrymdamasyna, sondaı-aq elimizdiń halyqaralyq sharttar týraly zańǵa tolyq kólemde sáıkes keledi», - dedi Ashat Aımaǵambetov.
